ҳуқуқ
НИЗОМИ НАВ. ҲАДАФ - СОДАГАРДОНИИ БАРАСМИЯТДАРОРИИ РАВОДИД
Дар Ҷумҳурии Тоҷикистон барои шаҳрвандони хориҷӣ ва шахсони бешаҳрванд аз 1 январи соли 2017 низоми нави электронии барасмиятдарорӣ ва судури раводид дар намояндагиҳои дипломатӣ ва муассисаҳои консулии кишвар дар хориҷа, Сарраёсати консулии Вазорати корҳои хориҷӣ ва фурудгоҳҳои Тоҷикистон ҷорӣ мегардад.
Низоми нав ба содагардонии барасмиятдарории раводиди Ҷумҳурии Тоҷикистон равона гардида, қадами навбатӣ барои электроникунонии хизматрасониҳои давлатӣ ба ҳисоб меравад. Минбаъд, шаҳрвандони хориҷӣ ва шахсони бешаҳрванд барои барасмиятдарории раводиди Ҷумҳурии Тоҷикистон дар намояндагиҳои дипломатӣ ва муассисаҳои консулии кишвар дар хориҷа ва тамдиди раводид дар Сарраёсати консулии Вазорати корҳои хориҷӣ бояд ҳуҷҷатҳои заруриро тавассути шабакаи интернетии www.visa.gov.tj пешниҳод намоянд. Пас аз баррасии пешакӣ, дархосткунанда тариқи почтаи электронӣ ба назди корманди консулӣ барои барасмиятдарории санадҳои зарурӣ даъват хоҳад шуд.
Бино ба иттилои Вазорати корҳои хориҷӣ, барасмиятдарории раводиди Ҷумҳурии Тоҷикистон дар фурудгоҳҳои ҷумҳурӣ низ тавассути шабакаи интернетии www.visa.gov.tj сурат хоҳад гирифт. Дар натиҷаи баррасии пешакӣ, низоми электронӣ ба дархосткунанда тариқи почтаи электронӣ тасдиқи даъватро ирсол мекунад, ки он бояд ҳангоми парвоз ва дар бюроҳои консулии Сарраёсати консулӣ дар фурудгоҳҳо ҳамчун ҳуҷҷати тасдиқкунанда барои дастрас намудани раводиди Ҷумҳурии Тоҷикистон пешкаш гардад.
Бо мақсади пешгирии нофаҳмӣ, таъкид мегардад, ки низоми нави электронии барасмиятдарории раводиди Ҷумҳурии Тоҷикистон ба низоми “Раводиди электронӣ”-и кишвар вобаста нест. Зеро “Раводиди электронӣ” тавассути шабакаи интернетии алоҳида - www.evisa.tj сурат гирифта, яккарата мебошад ва ба муҳлати 90 рӯз амал мекунад. Аммо дорандаи он метавонад дар қаламрави кишвар аз санаи воридшавӣ на зиёда аз 45 рӯз қарор дошта бошад. “Раводиди электронӣ”-и Ҷумҳурии Тоҷикистон, ба истиснои ҳолатҳои форс - мажорӣ, тамдид карда намешавад.
Додоҷон РӮЗИЕВ, «Ҷумҳурият»
Баёни ақида (0) Санаи нашр: 20.12.2016 №: 249 Мутолиа карданд: 4173
