маориф
“МАГАР ИН МУМКИН АСТ?”
(«Ҷумҳурият», 29 ноябри соли 2016)
Шуъбаи маориф бо арзи эҳтироми самимӣ ва итминони комил аз дастгириҳои ҳамешагии шумо дар инъикоси масоили соҳаи маориф изҳори сипос менамояд. Ҳамзамон, ба шумо иттилоъ медиҳем, ки номаи З. Акрамов, сокини деҳаи Восеободи Хурди ноҳияи Восеъ, ки дар гӯшаи «Шаҳрванд» - и рӯзнома нашр шудааст, сухан дар бораи мактаби № 64 - и ноҳияи Восеъ меравад, ки ҳампаҳлуи беморхонаи касалиҳои сил мебошад. Нома дар маҷлиси назоратии назди мудири шуъба (1.12.2016) мавриди баррасӣ қарор дода шуд.
Бояд ёдовар шуд, ки дар асоси қарори раиси ноҳияи Восеъ аз 21.09.1999 дар заминаи боғчаи Ҷамоати деҳоти ба номи Абдӣ Авазов муассисаи таҳсилоти асосии умумии № 64 таъсис ёфта, бо қарори раиси ноҳияи Восеъ аз 29.08.2014, № 513 аз муассисаи таҳсилоти асосии умумӣ ба муассисаи таҳсилоти миёнаи умумӣ табдил дода шудааст.
Муассисаи мазкур дорои 8 синфхона буда, дар он 421 нафар хонанда таҳсил менамояд. Соли 2015 ба тариқи ҳашар сохтмони 5 синфхона оғоз шуда, айни замон масолеҳи сохтмонӣ барои пӯшондани боми синфхонаҳои иловагӣ омода гардидааст, ки то моҳи марти соли 2017 пурра ба истифода дода мешавад.
Ҳангоми таъсисдиҳии муассиса дар соли 1999 дар шафати муассиса беморхонаи касалиҳои сил вуҷуд надошт. Аз давраи таъсисдиҳии беморхонаи касалиҳои сил то ҳол ҳолатҳои таъсири ангезаҳои ин беморӣ маҳз аз беморхонаи мазкур ба омӯзгорону хонандагони муассиса аз тарафи ниҳодҳои Вазорати тандурустӣ ва ҳифзи иҷтимоии Ҷумҳурии Тоҷикистон ба қайд гирифта нашудааст.
Сироҷиддин ГУРЕЗОВ,
мудири шуъбаи маорифи ноҳияи Восеъ
Баёни ақида (0) Санаи нашр: 21.12.2016 №: 250-251 Мутолиа карданд: 6283
