ҳуқуқ
СУДИ КОНСТИТУТСИОНӢ АЗ ПЕШНИҲОД ОИД БА ОМӮЗИШИ ҲАТМИИ КОНСТИТУТСИЯ ИСТИҚБОЛ КАРД
Ташаббусҳои созандаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати ҳалли масоили вобаста ба об ба хотири саодати тамоми сокинони сайёра ва дастрасии онҳо ба оби тозаи нӯшиданӣ равона гардидааст.
Ин матлабро Маҳкам Маҳмудзода, раиси Суди конститутсионии Ҷумҳури Тоҷикистон, 28 декабр зимни як нишаст оид ба омӯзиши муҳтавои Паёми Президенти мамлакат ба Маҷлиси Олӣ ва аҳамияти таърихии қабули Қатъномаи Маҷмаи умумии Созмони Милали Муттаҳид оид ба Даҳсолаи байналмилалии амал «Об барои рушди устувор», солҳои 2018-2028 баён намуд. - Боиси сарфарозист, ки дар соли таҷлили 25-умин солгарди Истиқлолияти давлатӣ ин ташаббуси навбатии байналмилалии Президенти Ҷумҳурии Тоҷикистон муҳтарам Эмомалӣ Раҳмон аз ҷониби ҷомеаи ҷаҳонӣ ҳамовозӣ пайдо намуда, 21 декабри соли равон аз ҷониби Маҷмаи умумии Созмони Милали Муттаҳид пазируфта шуд, - изҳор дошт Маҳкам Маҳмудзода.
Аз Суди конститутсионӣ ба «Ҷумҳурият» иттилоъ доданд, ки дар ҳамоиш мазмуну муҳтавои Паёми Президенти мамлакат ба Маҷлиси Олӣ дар меҳвари таваҷҷуҳ қарор гирифта, таъкид шуд, ки ин ҳуҷҷати стратегии ҳадафманд рушди соҳаҳои мухталифи ҷомеаро дар як давраи муайян ҷамъбаст намуда, пешбурди сиёсати мутавозини давлатиро бобати иҷрои барномаву стратегияҳои давлатӣ ба хотири ҳалли масъалаҳои иҷтимоии аҳолӣ муайян мекунад. Кормандони Суди конститутсионӣ аз пешниҳоди Сарвари давлат оид ба омӯзиши ҳатмии Конститутсия, қонунҳои Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» ва «Дар бораи масъулияти падару модар дар таълиму тарбияи фарзанд» дар барномаҳои муассисаҳои таълимӣ истиқбол намуданд. Бо қаноатмандӣ зикр шуд, ки Пешвои миллат, ҳамчунин ба хотири рушди минбаъдаи фаъолияти ҳуқуқэҷодкунӣ таҳияи Консепсияи сиёсати ҳуқуқии Ҷумҳурии Тоҷикистонро аз ҷониби вазорату идораҳои дахлдор тақозо карданд. Ба бовари онҳо амалишавии ин ва дигар ҳадафҳои дар Паём пешниҳодгардида барои рушди ҷомеаи демокративу ҳуқуқбунёд, ки дар он инсон ва ҳуқуқу озодиҳои ӯ арзиши олӣ эътироф шудаанд, ҳамчунин тақвияти манфиатҳои миллӣ, таҳкими сулҳу субот ва якпорчагию ваҳдати миллӣ мусоидат мекунад.
Ф. ҶУМЪАЕВ, «Ҷумҳурият»
Баёни ақида (0) Санаи нашр: 29.12.2016 №: 258 Мутолиа карданд: 3978