ҳуқуқ
ХАДАМОТИ ГУМРУК. 4 533 ҲОЛАТИ ҲУҚУҚВАЙРОНКУНӢ МУАЙЯН ШУД
Кормандони воҳидҳои мубориза бар зидди ҳуқуқвайронкуниҳои гумрукии Хадамоти гумруки назди Ҳукумати ҷумҳурӣ соли 2016 - ум 4533 ҳолати қонуншикании гумрукиро ба қайд гирифтаанд, ки аз рӯйи 63 ҳолаташ парвандаҳои ҷиноятӣ оғоз карда шудааст.
- Аз парвандаҳои оғозгардида 4 ҳолат ба ҷинояти гардиши ғайриқонунии маводи нашъаовар (26 кг 669 грамм маводи нашъаовар мусодира шудааст, ки аз он 11 грамм ҳероин, 7 кг 492 грамм афюн ва 19 кг 176 граммашро ҳашиш ташкил медиҳад), 29 ҳолат ба ҷиноятҳои қочоқи мол ва воситаҳои нақлиёт ва 30 ҳолат марбут ба фаъолияти гумрук мансуб мебошанд, - мегӯяд сардори раёсати ташкили мубориза бар зидди ҳуқуқвайронкуниҳои гумрукии хадамот, Шафизода Исроил Исмоил. – Дар соли рафта кормандони раёсатҳои минтақавии гумрукӣ фаъолияти назаррас нишон доданд. Чунончи, 26 парванда ба вилояти Суғд, 4 парванда ба вилояти Хатлон, 12 парванда ба шаҳри Душанбе ва 21 парванда ба раёсати ташкили мубориза бар зидди ҳуқуқвайронкуниҳои гумрукӣ рост меояд. Аз миқдори умумии парвандаҳои ҷиноятӣ дар 7 ҳолат парвандаи ҷиноятӣ нисбат ба молҳои зераксизӣ, аз ҷумла 2-тоӣ оид ба воридоти ғайриқонунии маснуоти заргарӣ ва воридоти воситаҳои нақлиёти сабукрав, 1-то ба воридоти маҳсулоти сӯзишворӣ ва 2-то ба воридоти маҳсулоти тамоку оғоз шудааст.
Нисбат ба 4470 ҳолат парвандаи ҳуқуқвайронкунии маъмурӣ тартиб дода, 4302 нафар шахси ҳуқуқию воқеӣ ба ҷавобгарии маъмурӣ кашида шуд. Дар натиҷаи баррасии парвандаҳои ҳуқуқвайронкунии маъмурӣ ба маблағи 7 546 866 сомонӣ ҷарима баста, 7 466 200 сомонӣ ситонда шуд.
Кормандони мақомоти гумрук дар ҳамбастагӣ бо мақомоти гумруки Иттиҳоди Давлатҳои Мустақил амалиёти “Лед 2”, “Транзит”, “Часовой-2016”, “RILO - Москва”, “Грифон II”, “Вестрерлайз 4”, “Ирэн” ва “Химера”- ро гузаронданд. Ин амалиётҳо барои ошкор ва пешгирӣ намудани қочоқи маводи мухаддир, маводҳои психотропӣ, прекурсорҳо, маҳсулоти тамоку, маводи тарфгарӣ, яроқу аслиҳа, сарватҳои бадеӣ ва таърихию фарҳангӣ, маводи дорувории пастсифат, асъор ва ҳуқуқвайронкуниҳо дар самти Интернет-савдо гузаронда шуданд.
Мавриди зикр аст, ки кормандони раёсати ташкили мубориза бар зидди ҳуқуқвайронкуниҳои гумрукии Хадамоти гумруки назди Ҳукумати Ҷумҳурии Тоҷикистон аз Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯҳи тоза гирифта, фаъолиятро дар соли 2017 боз ҳам пурзӯр хоҳанд кард.
Мирзои ФИРӮЗ, “Ҷумҳурият”
Баёни ақида (0) Санаи нашр: 06.01.2017 №: 4 Мутолиа карданд: 3874
