ҳуқуқ
ЗАРАР. АЗ КАМОМАД ТО ИЗОФАНАВИСӢ
10 январ аз таъсиси Агентии назорати давлатии молиявӣ ва мубориза бо коррупсияи Ҷумҳурии Тоҷикистон даҳ сол пур мешавад. Дар ин муддат кишвари мо барои пешгирӣ ва коҳиш додани сатҳи коррупсия тадбирҳои муассир андешида, ба натиҷаҳои назаррас ноил гардид. Мавриди амал қарор гирифтани Фармони Президенти Ҷумҳурии Тоҷикистон, аз 21 июли соли 1999 «Дар бораи тадбирҳои иловагии пурзӯр намудани мубориза бар зидди ҷинояткорӣ дар соҳаи иқтисод ва коррупсия (ришвахӯрӣ)», Қонуни Ҷумҳурии Тоҷикистон «Дар бораи мубориза бар зидди коррупсия», кодексҳои ҷиноятӣ, мурофиавии ҷиноятӣ ва дигар санадҳои меъёрии ҳуқуқӣ ҷиҳати мубориза бо ин зуҳуроти номатлуб такони ҷиддӣ бахшиданд.
Азамат Наврӯззода, сардори Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар Вилояти Мухтори Кӯҳистони Бадахшон зикр кард, ки фаъолияти раёсат дар ВМКБ аз моҳи майи соли 2007 ба роҳ монда шуд. Дар ин давра раёсати агентӣ дар 1712 идораву муассиса, ташкилоту корхонаҳои шаҳри Хоруғ, ноҳияҳо ва сохторҳои мақомоти иҷроияи маҳаллии ҳокимияти давлатии вилоят санҷиш гузаронда, ба маблағи 32 700 823 сомонӣ зарари молиявиро ошкор намуд. Аз ин хароҷотҳои ғайриқонунии пулию молӣ 10 315 675 сомонӣ, камомад ва тасарруфи воситаҳои пулию молӣ 9 531 248 сомонӣ, изофанависӣ дар корҳои таъмиру сохтмонӣ 567153 сомонӣ, зарар аз фурӯш ва ба иҷора додани амволи давлатӣ 237013 сомонӣ, талафи воситаҳои пулию молӣ аз бесарусомонӣ 9 531 248 сомонӣ ва маблағҳои камҳисобгардида ва рӯйпӯшнамудаи андозҳо 5 512 750 сомониро ташкил медиҳанд. Аз маблағи умумии зарари молиявии ошкоршуда 19 535 648 сомонӣ рӯёнда шуда, аз он 13 496 852 сомонӣ ба буҷети давлат барқарор гардидааст.
Бино ба иттилои Азамат Наврӯззода, дар Вилояти Мухтори Кӯҳистони Бадахшон дар давоми даҳ соли фаъолияти раёсати агентӣ 557 ҷиноят ба қайд гирифта шудааст. Аксари онҳоро (510 адад) ҷиноятҳои коррупсионӣ ва иқтисодии хусусияти коррупсионидошта, аз ҷумла азонихудкунии пулу моли давлат, исрофкорӣ, қаллобӣ, баромадани мансабдорон аз ҳадди ваколатҳо ва суистифода аз ваколатҳои мансабӣ ташкил медиҳанд. Ин ҳолат кормандони Агентии назорати давлатии молиявӣ ва мубориза бо коррупсияро муваззаф месозад, ки якҷо бо дигар ниҳодҳои ҳифзи ҳуқуқ, мақомоти иҷроияи маҳаллии ҳокимияти давлатии шаҳру ноҳияҳо вазифаҳои ба зиммаашон гузошташударо бо ҳисси баланди масъулиятшиносӣ ва кордонию садоқат ба халқу Ватан иҷро намоянд. Зеро Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Паёми имсолаи худ ба Маҷлиси Олӣ таъкид карданд, ки мубориза ба муқобили коррупсия фақат вазифаи мақомоти ҳифзи ҳуқуқ нест. Дар ин мубориза тамоми аҳли ҷомеа, ҳар як шаҳрванд ва ҷомеаи шаҳрвандӣ низ бояд бетараф набошад. Танҳо дар ҳамин сурат мо метавонем сатҳи коррупсияро дар мамлакат коҳиш диҳем.
- Мо, кормандони Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар Вилояти Мухтори Кӯҳистони Бадахшон, муваззаф гаштаем, ки дастуру ҳидоятҳои Пешвои миллатро, ки аз Паёмашон ба Маҷлиси Олӣ бармеоянд, дар меҳвари фаъолият қарор дода, дар пешрафту шукуфоии Ватани маҳбубамон – Тоҷикистони соҳибистиқлол саҳми шоиста гузорем, - иброз дошт Азамат Наврӯззода.
Раҳмони ГУЛЗОР, “Ҷумҳурият”
Баёни ақида (0) Санаи нашр: 09.01.2017 №: 5 Мутолиа карданд: 3574