маориф
САНГВОР. КӮДАКОНИ ЯТИМ ДИГАР БЕПАРАСТОР НЕСТАНД
Дар мактаб - интернати ҷумҳуриявии кӯдакони ятими ноҳияи Сангвор 162 нафар хонанда ба таҳсил фаро гирифта шудааст, ки аз ин шумора 50 нафарашро духтарон ташкил медиҳанд. Дар муассисаи мазкур 20 нафар омӯзгор ва 8 нафар мураббии соҳибтаҷриба ба таълиму тарбияи насли наврас машғуланд.
Сол аз сол вазъи таъминоти мактаб – интернат беҳтар мегардад. Мувофиқи нақшаи хароҷот маблағи умумии соли гузашта ҷудошуда 229000 сомониро ташкил дод. Дар ҷавоб ба ин ғамхориҳо хонандагони мактаб – интернат бо баҳои хубу аъло таҳсил намуда истодаанд. Соли сипаришуда 35 нафар хонандагони он дар озмунҳои ноҳиявӣ ва минтақавӣ ширкат варзида, 21 нафар соҳиби ҷойҳои ифтихорӣ гардиданд.
Дар мактаб – интернат, асосан ятимону бепарасторон, кӯдакон аз оилаҳои камбизоат, ҳамчунин хонандагоне, ки дар ҷойи зисташон мактаб надоранд, фаро гирифта шудаанд. Таълимгоҳ бо хобгоҳҳои алоҳида барои духтарон ва писарон, ҳуҷраву толорҳои ободу зебо ва бо ашёву лавозимоти лозима таъмин мебошад. Тарбиятгирандагони ин даргоҳ се вақт бо хӯроки гарм таъмин буда, аз хизматрасонии тиббӣ бархӯрдоранд.
Тибқи иттилои Абдулҳай Ёров, директори муассисаи мазкур, имсол дар арафаи Соли нави мелодӣ аз тарафи мақомоти иҷроияи маҳаллии ҳокимияти давлатии ноҳияи Сангвор ба хонандагони мактаб - интернати мазкур кумак расонда шуд. Кумак, асосан аз сарулибос ва туҳфаҳои солинавӣ иборат буд. Дар маҷмӯъ соли гузашта аз ҷониби нафарони саховатпеша ба мактаб – интернат ба маблағи 6033 сомонӣ маводи хониш ва хӯрокворӣ дастрас шуд.
Ҳамаи ин ғамхориҳо аз сиёсати хирадмандонаи давлату Ҳукумати ҷумҳурӣ ва роҳбари ғамхори мо - Пешвои миллат муҳтарам Эмомалӣ Раҳмон дар самти дастгирии табақаҳои ниёзманди аҳолӣ буда, барои сазовор тарбия намудани насли наврас дар дурдасттарин манотиқи кишвар мусоидат менамояд.
Дилшод АМИРОВ, «Ҷумҳурият»
Баёни ақида (0) Санаи нашр: 10.01.2017 №: 6 Мутолиа карданд: 5198
