маориф
"ҲИСОР. МАКТАБИ № 87 БА ТАЪМИРИ АСОСӢ НИЁЗ ДОРАД"
(«Ҷумҳурият», 1 январи соли 2017)
Бояд гуфт, ки матлаби навишташудаи хабарнигорон нисбат ба нокифоя будани шароити таълиму тарбия дар муассисаи мазкур ба куллӣ дуруст аст. Дар ҳақиқат, бинои муассисаи таҳсилоти умумии асосии № 87 – и шаҳри Ҳисор, ки аз 9 синфхона иборат аст, ҳанӯз солҳои 50 - уми асри XX бе ягон таҳкурсии бетонӣ сохта шуда, тӯли 70 сол аст, ки ҳамчун бинои таълимгоҳ истифода мешавад.
Лозим ба таъкид аст, ки теъдоди чунин муассисаҳои таълимӣ, ки ниёз ба бозсозӣ ва таъмиру тармими куллӣ доранд, дар шаҳри Ҳисор кам нестанд. Ҳамасола дар робита ба дастури Пешвои миллат оид ба таҳаввули соҳаи маориф дар шаҳр биноҳои нави муассисаҳои таълимӣ бунёд карда шуда, мавриди истифода қарор мегиранд, ки ин боиси марҳила ба марҳила беҳтар шудани вазъи соҳаи маорифи шаҳр мегардад. Аз ҷумла, тӯли се соли охир дар ҳудуди шаҳри Ҳисор 8 бинои муассисаи таҳсилотӣ бунёд ва муҷаҳҳаз карда шуд, ки МТМУ - и №№ 19, 56, 20, 16, 23, 84, 31 ва мактаби президентӣ барои хонандагони болаёқат аз зумраи онҳо мебошанд.
Метавон умедвор шуд, ки тӯли солҳои оянда бо назардошти имконият бинои муассисаи таҳсилоти умумии асосии № 87 низ чун муассисаҳои дар боло номбаргардида азнавсозӣ ва ё таъмиру тармими куллӣ карда хоҳад шуд.
Н. АСАДЗОДА,
мудири шуъбаи маорифи шаҳри Ҳисор
Баёни ақида (0) Санаи нашр: 19.01.2017 №: 14-15 Мутолиа карданд: 4642
