ҳуқуқ
ТАРБИЯИ ҲУҚУҚӢ ДАР МЕҲВАРИ ТАВАҶҶУҲ ҚАРОР МЕГИРАД
Соли сипаришуда Шӯрои вилоятии мутобиқсозию методӣ оид ба таълим ва тарбияи ҳуқуқии шаҳрвандони назди раиси Вилояти Мухтори Кӯҳистони Бадахшон дар самти ҳамоҳангсозии қонуният ва тарбияи ҳуқуқии аҳолӣ корҳои судманд анҷом дод. Дар ин давра вазъи ҳуқуқии шаҳру ноҳияҳои вилоят, риояи қонуният пайваста мавриди баррасии шӯро қарор гирифта, истифодаи воситаҳои ҳуқуқӣ ба мақсади рушди самараноки иқтисодиёт, баланд бардоштани сатҳи некуаҳволии мардум, мустаҳкам кардани интизоми меҳнат дар идораҳои давлатӣ, ҷамъиятӣ ва истеҳсолот беш аз пеш беҳтар шуд.
Зиёратшо Ғайратшозода, сардори Раёсати адлияи вилоят, ҳамзамон котиби шӯро, аз фаъолияти баъзе аъзои Шӯрои вилоятии мутобиқсозию методӣ оид ба таълим ва тарбияи ҳуқуқии шаҳрвандони вилоят дар соли сипарӣ изҳори нигаронӣ намуд. Ӯ ба гунаи мисол зикр кард, ки аз 49 нафар сардори мақомоти давлатӣ - аъзои шӯрои мазкур доир ба иҷрои қарорҳои Ҳукумати мамлакат танҳо 14 ниҳод аз фаъолияти худ ба шӯро гузориш пешниҳод кард. Раёсатҳои маориф ва илм, тандурустӣ, кумитаи ҷавонон, варзиш ва сайёҳӣ, шуъбаи фарҳанг, Пажӯҳишгоҳи улуми инсонии назди Академияи илмҳои Ҷумҳурии Тоҷикистон дар шаҳри Хоруғ, мақомоти иҷроияи маҳаллии ҳокимияти давлатии шаҳру ноҳияҳо аз ҷумлаи ниҳодҳое мебошанд, ки баъди ёдрасии чандинкарата ҳам ба шӯро ягон маълумот пешниҳод карда натавонистанд. Корҳои ташвиқотиву тарғиботӣ дар маҳаллаҳо, ҷамоатҳои шаҳраку деҳот, корхонаву ташкилотҳо дар сатҳи паст арзёбӣ гардид.
Шодихон Ҷамшед, раиси ВМКБ, ки ҳамзамон раиси Шӯрои вилоятии мутобиқсозию методӣ оид ба таълим ва тарбияи ҳуқуқии шаҳрвандон мебошад, тарбияи баланди ҳуқуқиро дар замони муосир муҳим арзёбӣ карда, зикр намуд, ки масъалаи баланд бардоштани маърифати ҳуқуқии аҳолӣ дар Паёми навбатии Президенти Ҷумҳурии Тоҷикистон ба Маҷлиси Олӣ махсус таъкид ёфта, густариши корҳои фаҳмондадиҳӣ яке вазифаҳои муҳимтарини мақомоти иҷроияи маҳаллии ҳокимияти давлатӣ арзёбӣ гардидааст. Дар ҳошияи ин ҳуҷҷати муҳим раиси вилоят масъулонро муваззаф сохт, ки дар муҳлатҳои наздиктарин фаъолияти шӯроҳои шаҳрию ноҳиявиро мавриди санҷиш қарор дода, аз натиҷаи он дар яке аз ҷаласаҳои шӯрои вилоятӣ гузориш диҳанд. Раиси вилоят доир ба фаъолияти аъзои шӯро дар давоми соли 2016 ва вазифаҳо барои соли равон ба роҳбарони идораву муассисаҳои вилоятӣ ҷиҳати рафъи камбудиҳои ҷойдошта ва вусъати корҳои фаҳмондадиҳӣ дастуру супоришҳои мушаххас дод.
Раҳмони ГУЛЗОР, “Ҷумҳурият”
Баёни ақида (0) Санаи нашр: 19.01.2017 №: 14-15 Мутолиа карданд: 3660
