энергетика
БАРҚИ ШАБОНАРӮЗӢ. БАРОИ РУШДИ БОСУБОТ ИМКОНИ БЕШТАР ФАРОҲАМ МЕОРАД
Аз солҳои нахустини соҳибистиқлолӣ расидан ба истиқлолияти энергетикӣ яке аз ҳадафҳои асосии Ҳукумати Ҷумҳурии Тоҷикистон қарор гирифт: дар ин ҷода бо талоши Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ва Ҳукумати мамлакат корҳои зиёд ба анҷом расиданд. Дар кишвар тавассути барқарор намудани инфрасохтори мавҷуда, ба кор андохтани иқтидорҳои нав, истифодаи сарфакоронаи неруи барқ, паст кардани талафоти он ва бунёди марказҳои нави барқу гармидиҳӣ натиҷаҳои хуб ба даст омаданд. Ниҳоят, эҳтиёҷоти рӯзафзуни аҳолӣ ва корхонаҳои истеҳсолӣ ба неруи барқ бароварда гардид, аҳолӣ пурра бо барқ таъмин шуд. Мардуми шарифи Тоҷикистон, аз ин иқдоми нек бо ифтихор ва сипосгузорӣ истиқбол намуд.
Сокинони ноҳияи Муъминободи вилояти Хатлон, ки ҳоло пурра бо неруи барқ таъминанд, аз пешрафти минбаъдаи соҳаҳои иқтисодию иҷтимоии ноҳия, ки ба мавҷудияти доимии неруи барқ бастагии калон доштанд, изҳори қаноатмандӣ карданд. Феълан, барои корхонаи истеҳсоли чойҳои шифобахши «Шифочой» - и ноҳия аз байн рафтани маҳдудияти барқ хеле бамаврид мебошад. Зеро фаъолияти корхона бо ҷалби занони маҳаллӣ аз ин ба баъд боз ҳам беҳтар хоҳад шуд. Роҳбари корхона Саидаҳтам Акрамов бо барқ пурра таъмин гардидани корхонаҳои истеҳсолиро ҷиҳати афзоиши иқтидори истеҳсолот ва рақобатпазирии маҳсулоти ватанӣ муҳим арзёбӣ намуд. Корхона нақша дорад, бо назардошти шароити мусоид ва талаботи мизоҷон ҳаҷми истеҳсолотро, ки солона 30 ҳазор қуттӣ чойро ташкил медиҳад, зиёд намояд.
Албатта, таъминот бо барқ пешрафти танҳо як корхона ва ё муассиса нест, тамоми соҳаҳои иқтисодию иҷтимоии минтақаҳои дурдасти кӯҳистон барои гузариш ба марҳилаи нави рушд имкони бештар пайдо карданд, ки ин аз ояндаи дурахшони Тоҷикистони азиз мужда мерасонад.
О. ВАФОБЕКЗОДА, «Ҷумҳурият»
Баёни ақида (0) Санаи нашр: 24.01.2017 №: 18 Мутолиа карданд: 20144
