ҳуқуқ
МАРЗ. БОЗДОШТИ 17 ҚОЧОҚЧӢ ДАР ЯК МОҲ
Дар зарфи як моҳи охир аз ҷониби хизматчиёни Қӯшунҳои сарҳадии Кумитаи давлатии амнияти миллӣ 17 қочоқчӣ, аз ҷумла 3 шаҳрванди Ҷумҳурии Исломии Афғонистон дастгир шуд.
Аз Маркази матбуоти Қӯшунҳои сарҳадӣ бо тасдиқи ин хабар ба “Ҷумҳурият” иттилоъ доданд, ки бо мақсади омӯзишу муайян намудани гурӯҳҳои муташаккили фаромиллии қочоқбар, пешгирии интиқоли маводи мухаддир, силоҳу муҳимоти ҷангӣ ва кӯшишҳои убури ғайриқонунии сарҳади давлатӣ давоми моҳи феврали соли ҷорӣ дар минтақаҳои отрядҳои сарҳадии “Ишкошим”, “Хоруғ”, “Шӯрообод”, “Ҳамадонӣ”, “Панҷ” ва “Панҷакент” амалиётҳои вижа гузаронда шуданд. Аз ҷумла, дар ҳамкорӣ бо дигар мақомоти қудратӣ ҳафт амалиёт анҷом шуда, аз қочоқчиён ба миқдори 165 килограмму 975 грамм маводи мухаддир дарёфт ва мусодира шудааст. Бино ба иттилои манбаъ, аз ин миқдор 74 килограмму 500 грамм маводи мухаддири навъи “ҳашиш”, 87 килограмму 570 грамм маводи нашъаовари навъи “афюн”, 3 килограмму 905 грамм “Мет-Амфитамин” ва 17 килограммро бангдона ташкил медиҳад. Инчунин, 2 адад силоҳи оташфишон бо тирдону тирҳояш дарёфт ва мусодира шудааст.
Дар сарҳади давлатии Ҷумҳурии Тоҷикистон бо давлатҳои ҳамсарҳад даҳ далели вайронкунии сарҳади давлатӣ, панҷ ҳолати риоя накардани низоми сарҳади давлатӣ сабт шуда, дар маҷмӯъ 35 нафар дастгир гардидааст. Дар як маврид байни марзбонон ва қочоқчиёни маводи мухаддир даргирии мусаллаҳона ба амал омадааст.
Дар робита ба далелҳои ошкоршуда ҳуҷҷатҳои лозима тартиб ва ба мақомоти дахлдори давлатӣ ирсол гардида, вобаста ба ҳамаи ҳолатҳо тафтишот идома дорад.
Танҳо дар давоми як моҳ ба манзури ҳали масоили наздисарҳадӣ, риояи низоми сарҳади давлатӣ, тасдиқи нақшаҳои дуҷониба ҷиҳати бархӯрди муносиб ба воқеоти марзӣ бо ниҳодҳои марбутаи кишварҳои ҳамсоя, назири Ҷумҳурии Исломии Афғонистон, ҷумҳуриҳои Ӯзбекистону Қирғизистон 13 маротиба вохӯрии ҷонибҳо сурат гирифтааст.
Фирӯзи РАҲМОНИЁН, “Ҷумҳурият”
Баёни ақида (0) Санаи нашр: 13.03.2017 №: 55 Мутолиа карданд: 1484
