ҳуқуқ
«НАЗАРФИРЕБӢ» ЗЕРИ НАЗОРАТИ ҚАТЪӢ ҚАРОР ГИРИФТ
Посух ба мақолаи «Назарфиребӣ», ки 11 январи соли 2017 дар Нашрияи расмии Тоҷикистон – рӯзномаи «Ҷумҳурият» (№ 7) ба табъ расидааст.
Прокуратураи ноҳияи Б. Ғафуров мақолаи «Назарфиребӣ» - ро, ки дар рӯзномаи «Ҷумҳурият» ба нашр расида буд, мавриди баррасӣ қарор дод.
Мақолаи мазкур натиҷаи санҷиши аз ҷониби прокуратураи ноҳияи Б. Ғафуров бо ҷалби мутахассисони Кумитаи идораи замин моҳҳои ноябр – декабри соли 2017 гузарондаро оид ба ҳолати истифодаи ғайримақсадноки заминҳои барои гармхонаҳо ҷудогардида низ дар бар гирифтааст. Дар рафти ин санҷиш дар фаъолияти хоҷагиҳои деҳқонии «Бародарон» (роҳбараш Расулов А.), ҶДММ «Шоҳиҷаҳон» (роҳбараш Раҳмонов А.), шаҳрвандон Ҳоҷибоев С., Аглуков А., Бобоҷонов С., Файзиева М. ва заминистифодабарандагони дигар як қатор қонунвайронкуниҳо, аз ҷумла мақсаднок истифода набурдани қитъаҳои замини барои гармхонаҳо ҷудогардида, сохтмони худсарона дар онҳо ва самаранок истифода набурдани қитъаҳои заминҳо ошкор гардиданд.
Аз рӯи натиҷаи санҷиш нисбати шахсони зикргардида бо моддаҳои дахлдори Кодекси ҳуқуқвайронкунии маъмурии Ҷумҳурии Тоҷикистон парвандаҳои ҳуқуқвайронкунии маъмурӣ оғоз гардида, қонуншиканон ҷаримабандӣ шуданд ва барои бартараф намудани қонунвайронкуниҳо дастурҳо гирифтанд.
Пас аз чопи мақола масъалаи зикргардида мавриди санҷиши такрорӣ қарор гирифт. Дар рафти он муайян гардид, ки талаботҳо ҳанӯз ҳам иҷро нагардидаанд ва қонунвайронкуниҳо дар ин самт идома доранд.
Шахсони масъули ҷамоатҳои деҳоти Хистеварз ва Овчиқалъача барои иҷрои талаботҳои дастур назорат набурда, вазифаҳои худро дуруст иҷро накардаанд.
Аз ин рӯ, аз ҷониби прокуратураи ноҳия нисбати муҳандис – заминсозони Ҷамоати деҳоти Хистеварз Ғафуров М. ва Ҷамоати деҳоти Овчиқалъача Маҳмудов Ҳ. дар бораи ба ҷавобгарии интизомӣ кашидан қарорҳо қабул гардида, ба мақомоти иҷроияи маҳаллии ҳокимияти давлатии ноҳия баҳри бартараф намудани камбудиҳои ҷойдошта пешниҳод ирсол шуд.
Прокуратураи ноҳияи Б. Ғафуров масъалаи зикршударо зери назорати қатъӣ қарор додааст ва оид ба ҳар як қонунвайронкунӣ чораҳои дахлдор меандешад.
Р. Қ. ПИРМАҲМАД,
прокурори ноҳияи Б. Ғафуров, мушовири давлатии адлияи дараҷаи 3
Баёни ақида (0) Санаи нашр: 15.03.2017 №: 57 Мутолиа карданд: 1329
