ҳуқуқ
СММ. ҲАДАФ - ТАҲКИМИ ҲАМКОРИҲО АЛАЙҲИ ТЕРРОРИЗМ
Дабири кулли Созмони Милали Муттаҳид Антониу Мануэл ди Оливейра Гутерреш дар ҷаласаи ғайрирасмии Маҷмаи умумӣ пешниҳод намуд, ки «Бояд гурӯҳи мақсаднок оид ба татбиқи чорабиниҳои зиддитеррористӣ ва маркази СММ оид ба мубориза бо терроризм аз департаменти масоили сиёсӣ бароварда шаванд ва раёсати нав оид ба мубориза бо терроризм таъсис ёбад».
Ба гуфтаи Дабири кул, фаъолияти раёсати мазкур соҳибихтиёрии миллии кишварҳои аъзои созмонро халалдор намесозад. «Ҳадафи мо ин таҳкими шарикӣ бо кишварҳои узви СММ дар мубориза бо масъалаи фаромиллии терроризм мебошад».
Бо мақсади пешгирӣ ва аз байн бурдани таҳдиду хатарҳои ҷаҳони муосир, бо ибтикори ин созмони бонуфузи байналмилалӣ ва сохторҳои марбутаи он мунтазам нишасту ҳамоишҳои сатҳи минтақавӣ ва байналмилалӣ доир гардида, иштирокдорон шеваҳои муассири муборизаро матраҳ ва тарҳрезӣ менамоянд. Чунин як мулоқоти судманд, ахиран, дар Вазорати корҳои хориҷии Ҷумҳурии Тоҷикистон баргузор шуд. Намояндагони вазорату ниҳодҳои дахлдори кишвар якҷо бо ҳайати Кумитаи зиддитеррористии Шӯрои амнияти СММ ва созмонҳои байналмилаливу минтақавӣ, аз ҷумла Созмони ҳамкории Шанхай, Созмони Аҳдномаи амнияти дастаҷамъӣ ва Иттиҳоди Давлатҳои Мустақил перомуни масоили вобаста ба мубориза алайҳи терроризм ва ифротгароӣ, роҳҳои таҳкими ҳамкорӣ дар мубориза бо таҳдидҳои амниятии муосир, тақвияти робитаҳои байналмилалӣ мубодилаи афкор намуданд.
Ҳайати намояндагони Кумитаи зиддитеррористии Шӯрои амнияти СММ дар доираи ин сафар, ҳамчунин бо кормандони Хадамоти гумруки назди Ҳукумати Ҷумҳурии Тоҷикистон мулоқоти судманд анҷом доданд. Дар вохӯрӣ мавзӯъҳои муқобала бо терроризм, амният ва мақомоти ҳифзи ҳуқуқ, ҳамкорӣ бо шарикони хориҷӣ, идораи самарабахши сарҳадот ва назорати ҷойивазкунии фаромарзии борҳо матраҳ шуданд. Дар вохӯрии намояндагони Кумитаи зиддитеррористии Шӯрои амнияти СММ бо кормандони Вазорати корҳои дохилӣ масъалаҳои мубориза бо терроризм, экстремизм, ҳамкорӣ дар самти фаъолияти Интерпол, табодули иттилоот ва дигар мавзӯъҳои мавриди таваҷҷуҳи ҷонибҳо матраҳ шуданд. Зикр гашт, ки мақомоти ҳифзи ҳуқуқи Тоҷикистон, ниҳодҳои марбутаи кишвар робитаҳои байналмилалиро дар мубориза бо даҳшатафканӣ, ифротгароӣ ва дигар зуҳуроти номатлуб беш аз пеш тақвият бахшида, барои таъмини амнияти минтақа ва ҷаҳон саҳми чашмрас мегузоранд.
Додоҷон РӮЗИЕВ, «Ҷумҳурият»
Баёни ақида (0) Санаи нашр: 15.03.2017 №: 57 Мутолиа карданд: 1215