ҳуқуқ
ҶИНОЯТ ва ҶАЗО
Қатли ҳамсар ва баҳонаи фишори баланди хун
Дар шаҳри Истаравшан марди 62-солае ҳамсари худ-ро ба қатл расондааст. Дар ин бора сомонаи Вазорати корҳои дохилӣ хабар дода, иттилоъ медиҳад, ки ҷинояти куштор 9 марти соли ҷорӣ дар хонаи истиқоматии ин шаҳрванд содир шудааст.
Гумонбар бо мақсади рӯйпӯш намудани ҷинояти содирнамудааш марги ҳамсарашро бар асари бемории фишори баланди хун арзёбӣ кардааст. Вале, тибқи санади ташхиси судӣ дар ҷасади зан аломатҳои марги маҷбурӣ бо тариқи зӯроварӣ, шикасти қабурғаҳо, изи бастани роҳҳои нафас ва хунхобравии зиёд муайян шудааст.
Аз рӯи далели мазкур бар асоси моддаи 104-и Кодекси ҷиноятии Чумҳурии Тоҷикистон аз ҷониби прокуратураи шаҳри Истаравшан парвандаи ҷиноятӣ оғоз гардидааст.
Дарёфти ҷасади модар бо духтараш, қотил дастгир шуд
Рӯзи 11 март ҷисми беҷони як зани 56-сола ва духтари 34-солааш, сокинони ноҳияи Синои шаҳри Душанбе, аз манзили истиқоматиашон бо аломатҳои марги маҷбурӣ, яъне бо ҷароҳатҳои бурандаву халанда, дарёфт шуданд.
Ҳангоми гузарондани чора-биниҳои оперативӣ - ҷустуҷӯӣ аз ҷониби гурӯҳи фаврӣ-тафтишотии созмоншуда вобаста ба ҷинояти куштори зикргардида марди 34-солаи сокини шаҳри Душанбе дастгир гардид.
Нисбат ба ин далел парвандаи ҷиноятӣ оғоз шуда, тафтишоти ҳодиса идома дорад.
Боздошти ғоратгаре, ки қаблан суд шудааст
Кормандони милитсия зимни гузарондани чорабиниҳои оперативӣ-ҷустуҷӯӣ дар шаҳри Душанбе марди 28-соларо ба гумони ғоратгарӣ боздошт намуданд.
Тибқи иттилои ВКД, дастгиршуда қаблан бо моддаҳои 244 ва 248-и Кодекси ҷиноятии Ҷумҳурии Тоҷикистон маҳкум ба зиндон шудааст. Гумонбаршуда 1 феврал дар кӯчаи Неъмат Қарабоеви пойтахт бо тариқи зӯроварӣ аз зани 31-солаи сокини шаҳри Душанбе 2-адад телефони мобилии тамғаҳои “Самсунг-галакси” ва “Нокиа”-ро тасарруф намуда, аз ҷойи ҳодиса ғайб задааст.
Аз рӯи далели мазкур парвандаи ҷиноятӣ оғоз гардида, тафтишот давом дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 16.03.2017 №: 58 Мутолиа карданд: 1374
