ҳуқуқ
КОРРУПСИЯ. 2 МИЛЛИАРД СОМОНӢ ЗАРАРИ МОЛИЯВӢ ОШКОР ШУД
Коррупсия зуҳуроти номатлубест, ки эътимоди мардумро ба давлат коста гардонда, обрӯву эътибори онро коҳиш медиҳад, барои рушди иқтисодиёти пинҳонӣ ва истифодаи ғайримақсадноки маблағҳои давлативу ҷамъиятӣ шароит фароҳам меорад ва дар маҷмӯъ, боиси поймолшавии ҳуқуқи инсон ва заиф шудани пояҳои ахлоқии ҷомеа мегардад.
Ба ин нукта кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон зимни корҳои ташвиқотӣ алайҳи коррупсия дар мулоқоту вохӯриҳо бо доираҳои гуногуни ҷомеа таъкид мекунанд. Дидору гуфтугӯҳои кормандони ин ниҳод бо роҳбарони вазорату идораҳо, корхонаву муассисаҳо, ташкилоту идораҳои дахлдор ҷиҳати бартараф намудани омилҳои бавуҷудоварандаи коррупсия васеъ ба роҳ монда шудааст. Ахиран дар доираи Нақшаи чорабиниҳои Сарраёсати пешгирии коррупсия вохӯрии навбатии масъулони Агентии назорати давлатии молиявӣ ва мубориза бо коррупсия дар Вазорати саноат ва технологияҳои нав, Агентии меҳнат ва шуғли аҳолии Вазорати меҳнат, муҳоҷират ва шуғли аҳолии Ҷумҳурии Тоҷикистон, Донишкадаи тарбияи ҷисмонии ба номи С. Раҳимов баргузор гардид.
Аз маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон ба «Ҷумҳурият» хабар доданд, ки дар ин мулоқотҳо перомуни хавфҳои коррупсия ба ҷомеа, роҳу усулҳои пешгирии омилҳои коррупсионӣ, дарки амиқи зарару оқибатҳои ногувори он, иҷрои бечунучарои талаботи қонунгузории зиддикоррупсионӣ мубодилаи судманди афкор сурат гирифт. Пешниҳод гардид, ки баҳри таъмини иҷрои саривақтии бандҳои дахлдори Нақшаи чорабиниҳои Сарраёсати пешгирии коррупсия, ҷилавгирӣ аз ҷиноятҳои коррупсионӣ ва роҳандозии корҳои таблиғотию ташвиқотӣ дар ин самт, пеш аз ҳама, бояд роҳбарони вазорату идораҳо, корхонаю муассисаҳо ва ташкилотҳо иқдом намуда, тадбирҳои қатъӣ андешанд.
Дар вохӯрии масъулони Агентии назорати давлатии молиявӣ ва мубориза бо коррупсия бо кормандони дастгоҳи марказӣ ва сохторҳои тобеи Вазорати маориф ва илми Ҷумҳурии Тоҷикистон натиҷаҳои мониторинги иҷрои Нақшаи чорабиниҳои татбиқи «Стратегияи муқовимат ба коррупсия дар Ҷумҳурии Тоҷикистон барои солҳои 2013 - 2020» мавриди баррасӣ қарор гирифт. Ба иттилои манбаъ, тадқиқоти сотсиологии аз ҷониби агентӣ анҷомгирифта нишон дод, ки аз 88455 нафари пурсидашуда 21660 нафар ё 24,4 дарсад сатҳи коррупсияро дар муассисаҳои таълимӣ баланд арзёбӣ намуданд, ки боиси нигаронист.
Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар давоми даҳ соли фаъолияташ дар вазорату кумитаҳо, мақомоти иҷроияи маҳаллии ҳокимияти давлатӣ, марказҳо ва гурӯҳҳои татбиқи лоиҳаҳои инвеститсионӣ, субъектҳои хоҷагидори давлатӣ ва дигар ташкилоту муассисаҳо 12 ҳазор тафтишу санҷиши молиявӣ гузаронда, ба маблағи умумии қариб 2 миллиард сомонӣ зарари молиявиро ошкор намудааст.
Сафаргул АЛИМОВА, «Ҷумҳурият»
Баёни ақида (0) Санаи нашр: 17.03.2017 №: 59 Мутолиа карданд: 1449
