ҳуқуқ
ҶИНОЯТ ва ҶАЗО
Боздошти гумонбарон барои дуздӣ
Кормандони мақомоти корҳои дохилӣ дар шаҳри Турсунзода зимни гузарондани чорабниҳои фаврӣ - ҷустуҷӯӣ як зани 28 - солаи сокини ҳамин шаҳрро ба гумони содир намудани ҷинояти дуздӣ боздошт карданд.
Бино ба иттилои дафтари матбуоти ВКД, боздошти ин шаҳрванд баъд аз муроҷиати зани 38-солаи сокини шаҳри Турсунзода иттифоқ афтодааст. Ҷабрдида ба кормандони милитсия арз кардааст, ки 11 марти соли ҷорӣ шахси номаълум бо роҳи пинҳонӣ вориди хонаи истиқоматиаш шуда, аз он ҷо 52 ҳазор рубли русӣ ва 2 ҳазору 340 сомониро дуздида, аз ҷойи ҳодиса ғайб задааст.
Дар натиҷаи гузарондани як чорабинии фаврӣ-ҷустуҷӯии дигар ба гумони дуздӣ 5 нафар сокини ноҳияи Дӯстӣ, ҷавонони аз 23 то 30 - сола дастгир шуданд. Гумонбаршудагон шаби 11 ба 12 март аз оғили зани 47 - солаи сокини Ҷамоати деҳоти 20 - солагии Истиқлолияти ноҳияи Дӯстӣ 7 сар моли майдаро дуздида, аз ҷойи ҳодиса ғайб задаанд.
Аз рӯи далелҳои мазкур парвандаҳои ҷиноятӣ оғоз гардида, тафтишот давом дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 30.03.2017 №: 67 Мутолиа карданд: 1192
