ҳуқуқ
ҶИНОЯТ ва ҶАЗО
Се бародар ҷамъ 52 сол ҳабс шуданд
Суди шаҳри Қӯрғонтеппа бародарон Алишер, Зафар ва Баҳодур Тиллоевҳоро барои суиқасди таҷовуз ба номус ва расондани зарари ҷисмонии вазнин, ки боиси марг шудааст, ба муддатҳои тӯлонӣ равонаи зиндон кард.
Ашхоси номбурда 9 июли соли 2016 дар ҳолати сархӯшӣ дар шаҳри Сарбанд бо истифодаи зӯроварӣ кӯшиши таҷовуз ба номуси шаҳрванд М. Ш. намуда, Буран Давуров - хусури ин занро, ки барои раҳоии келинаш ба ҷойи ҳодиса омадааст, латукӯб намудаанд. Дар натиҷа ҷабрдида баъд аз як рӯз дар Беморхонаи клиникии ба номи Б. Воҳидови вилояти Хатлон ба ҳалокат расидааст.
Аз суди шаҳри Қӯрғонтеппа ба хабарнигори “Ҷумҳурият” дар вилояти Хатлон иттилоъ доданд, ки бо ҳукми суд Алишер Тиллоев 20 сол, Зафар Тиллоев 17 сол, Баҳодур Тиллоев ба муҳлати 15 сол равонаи зиндон шуданд. Тибқи таъйиноти суд, онҳо муҳлати адои ҷазоро дар колонияҳои ислоҳии низоми сахт сипарӣ хоҳанд кард.
Пешниҳоди пора на роҳи раҳоист, балки ҷиноят аст
Мудири анбори мактаб - интернати ҷумҳуриявии кӯдакони ятими Вазорати маориф ва илми ҷумҳурӣ дар ноҳияи Шаҳринав Б. Низомов барои истифодаи маҳсулоти ғизоии муҳлаташ гузашта ва пешниҳоди пора ба ёрдамчии прокурори ноҳия пушти панҷараи зиндон рафт.
Санҷиши прокуратураи ноҳияи Шаҳринав дар мактаб-интернати мазкур нишон додааст, ки Б. Низомов маҳсулоти ғизоии муҳлаташ гузашта ва ба талаботи стандарти давлатӣ ҷавобгӯ набударо дар анбор нигоҳ дошта, моҳи январи соли 2017 аз он дар тайёр намудани хӯрок барои кӯдакони ятим истифода бурдааст.
Маркази матбуоти Прокуратураи генералии Ҷумҳурии Тоҷикистон иттилоъ медиҳад, ки номбурда барои аз ҷавобгарии ҷиноятӣ раҳо шудан ба ёрдамчии прокурори ноҳия 3 000 сомонӣ пора пешниҳод намуда, моҳи феврал ҳангоми додани ришва дастгир шуд.
Дар робита ба ин аъмоли ношоиста нисбат ба Б. Низомов парвандаи ҷиноятӣ бо моддаҳои 209 қисми 1 ва 320 қисми 2-и Кодекси ҷиноятии Ҷумҳурии Тоҷикистон боз шуда, баъд аз анҷоми тафтиши пешакӣ ба суд ирсол гардид. Суди ноҳия парвандаро баррасӣ намуда, мудири анбори мактаб-интернатро 5 солу 6 моҳ аз озодӣ маҳрум кард.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 03.04.2017 №: 69 Мутолиа карданд: 1116