ҳуқуқ
ГУМРОҲӢ ВА СЕЗДАҲ СОЛИ МАҲРУМӢ АЗ ОЗОДӢ
Суди вилояти Хатлон сокини ноҳияи Бохтар Баҳодур Тухтаеви 22 - соларо бо моддаи 3071 қисми 2, 32 қисми 3 - 4011 - и Кодекси ҷиноятии Ҷумҳурии Тоҷикистон бо аломатҳои содир кардани ҷинояти даъвати оммавӣ ба фаъолияти экстремистӣ бо истифодаи шабакаи интернетӣ ва суиқасд дар иштироки ғайриқонунии шаҳрвандони Ҷумҳурии Тоҷикистон дар задухӯрдҳои мусаллаҳона ё амалиёти ҷангӣ дар дигар давлатҳо ба муҳлати 13 сол аз озодӣ маҳрум кард.
Тавре аз ҳукми додгоҳ бар меояд, Тухтаев Баҳодур ҳангоми дар шаҳри Маскави Федератсияи Русия буданаш, моҳи августи соли 2016 худро дар шабакаи иҷтимоии «Одноклассники» бо номи мустаори «Ey Ummat Trij Farzi Ayn boldi» (Эй уммат, ҷиҳоди зинда фарзи айн шуд), ки бо пешниҳоди хоҷагонаш номгузорӣ шудааст, сабт намуда, тавассути он пайваста наворҳои амалиёти ҷангии аъзои ташкилоти экстремистию террористии «Давлати исломӣ»-ро тамошо мекардааст. Номбурда соли 2016 дар сомонаи иҷтимоии худ 26 акси хусусияти экстремистидоштаро ҷой дода, бо ин роҳ барои ба амал баровардани фаъолияти экстремистии созмонҳои террористӣ даъвати оммавӣ намудааст. Мувофиқи хулосаи комиссияи коршиносони Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон, аз 12 январи соли 2017, дар 13 акси аз саҳифаи интернетии «Одноклассники» - и Баҳодур Тухтаев дарёфтшуда даъватҳои оммавӣ барои ба амал баровардани фаъолияти экстремистӣ, аз ҷумла барангехтани кинаю адоват, низои динӣ ва мазҳабӣ дар байни мардум дида мешавад. Ин ҷавони гумроҳ аввали моҳи декабри соли 2016 бо даъвати хоҷагони хориҷиаш кӯшиши аз шаҳри Маскав ба Ҷумҳурии Туркия ва аз он ҷо ба Сурия рафтанро карда, дар фурудгоҳи Шереметово аз ҷониби кормандони Хадамоти бехатарии Федератсияи Русия (ФСБ) дастгир шуд.
Солҳои охир аз ҷониби мақомоти қудратӣ ва интизомии Тоҷикистон дар амри мубориза бо ифротгароӣ ва терроризм чораҳои муассир андешида шуда, миқёс ва мизони ин хатарҳо ба таври қобили мулоҳиза коҳиш ёфтааст. Вале омори содиршавии ҷиноятҳои дорои хусусияти террористию экстремистидошта дар вилояти Хатлон ва таҳлили сабабу омилҳои он нишон медиҳанд, ки дар мубориза бо ин зуҳуроти номатлуб бояд тадбирҳои бештар андешида шаванд.
Хурофот, таассуб, ифротгароӣ ва бесаводӣ ҷаҳолат ва торикист ва ба мардум танҳо бадбахтӣ меоранд. Чунин падидаҳои аҳриманӣ набояд мояи бадбахтию сияҳрӯзии худу фарзандон, пайвандон ва ҳамватанон бошанд.
Лашкар ШАРИФЗОДА, “Ҷумҳурият”
Баёни ақида (0) Санаи нашр: 06.04.2017 №: 71 Мутолиа карданд: 1079
