ҳуқуқ
ЯК ЛАҲЗА ҒАФЛАТ – ЯК УМР ҲАСРАТ
Шуъбачаи Бозрасии давлатии автомобилии шуъбаи 1 - и Вазорати корҳои дохилии Ҷумҳурии Тоҷикистон дар ноҳияи Рӯдакӣ барои пешгирӣ ва таъмини бехатарии иштирокчиёни ҳаракат дар роҳ, тартиботи ҷамъиятӣ, баланд бардоштани маърифати ронандагӣ, коҳиш додани ҳолатҳои садамавӣ ва мубориза бар зидди ҷинояткорӣ ҳамеша чораҳои зарурӣ меандешад.
Ноҳияи Рӯдакӣ яке аз калонтарин ноҳияҳои тобеи ҷумҳурӣ буда, аз ҳудуди хизматии ШВКД-1 - и ин минтақа ба ҷуз 304,5 километр роҳи дорои аҳамияти ҷумҳуриявию маҳаллидошта, инчунин, 24,6 километр роҳи дорои аҳамияти байналмилалидошта низ мегузарад. Аз ин сабаб, таъмини бехатарии ҳаракат дар роҳ, ҷамъоварии андози нақлиёт ва муоинаи техникии он аз кормандони шуъбача масъулият ва фаъолияти пурсамари шабонарӯзиро тақозо мекунад. Саидбурҳон Асламзода, сардори ШБДА – и ноҳия, подполковники милитсия, зимни суҳбат иброз дошт, ки бо вуҷуди андешидани чораҳои зарурӣ ва назорати пайваста, шумораи ҳуқуқвайронкуниҳо дар ин самт рӯ ба афзоиш овардааст. Яке аз сабабҳои асосӣ зиёд шудани шумораи нақлиёт дар ҳудуди ноҳия дониста мешавад. Зеро то охири соли 2016 агар дар ноҳия 13 393 адад воситаи нақлиёт ба қайд гирифта шуда бошад, дар ду моҳи соли равон ин шумора 318 адади дигар афзудааст. Ин тамоюл аз кормандони мо масъулияти бештар талаб мекунад. Аз ҷониби дигар, дар ин самт баъзе мушкилиҳо низ эҷод мешаванд. Масалан, соли сипаришуда дар ноҳия 50 садамаи нақлиётӣ рух дод, ки дар натиҷа 49 нафар ҷароҳатҳои гуногуни ҷисмонӣ бардошта, 14 нафари дигар ба ҳалокат расид.
- Бешубҳа, аксари фоҷиаҳо аз одитарин қоидавайронкунӣ оғоз меёбанд. Ҳангоми рондани мошин бо телефон гуфтугӯ кардан, сигор кашидан, бо мусофирон ҳамсуҳбат шудан, бо асабонияти зиёд, дар ҳолати мастӣ ва бе шаҳодатномаи ронандагӣ сари чанбарак нишастан, аз рӯи ҳавас ба сабқат баромадан сабаби рух додани ҳодисаҳои нохуш мегарданд, ки шояд то охири умр ислоҳнопазир бошанд. Бахусус, тавассути нақлиёт пахш кардани иштирокчиёни ҳаракат дар роҳ пушаймонии беинтиҳо меорад. Беҳуда, дар баъзе аз мошинҳои бузурги боркаш нанавиштаанд: «Эй сорбон, оҳиста рон!», «Як лаҳза ғафлат- як умр ҳасрат», - изҳор медорад Саидбурҳон Асламзода.
Шуъбачаи мазкур барои дуруст ва сари вақт гузарондани муоинаи техникӣ бо ҶДММ «СП Автодиагностика» шартномаи ҳамкорӣ дошта, ҳолати коршоямии васоити техникӣ дар нуқтаҳои хизматрасонӣ санҷида мешавад. Ҳамкории ШБДА бо мақомоти прокуратура, андоз ва дигар ниҳодҳои дахлдор хуб ба роҳ монда шудааст. Онҳо якҷо бо кормандони шуъбача 28 чорабинии муштарак гузаронда, 498 ронандаи қонуншиканро, ки бе патент ва ҳуҷҷатҳои зарурӣ кору фаъолият доштанд, ошкор сохтанд. Инчунин, аз андози воситаҳои нақлиёт 2 миллиону 711 ҳазору 170 сомонӣ ҷамъоварӣ намуданд.
Ба андешаи Саидбурҳон Асламзода, маърифати ҳуқуқӣ ва ронандагии соҳибони воситаҳои нақлиёт бояд баланд бардошта шавад. Онҳо андозҳои давлатиро дар вақташ супурда, автомашинаашонро дар муҳлати муқарраргардида аз муоинаи техникӣ гузаронанд. Барои ин, дар курсҳо ва омӯзишгоҳҳои махсус, ки ронанда тайёр мекунанд, ҷорӣ намудани дарси маърифати ронандагӣ ногузир аст.
Додоҷон РӮЗИЕВ,
Бузургмеҳри БАҲОДУР,
«Ҷумҳурият»
Баёни ақида (0) Санаи нашр: 06.07.2017 №: 71 Мутолиа карданд: 1209
