ҳуқуқ
ҶИНОЯТ ва ҶАЗО
Дуздӣ дар корхонаи коркарди пахта
Ба мақомоти милитсия марди соҳибкори 35 - солаи сокини шаҳри Кӯлоб муроҷиат намуд, ки шаби 3 ба 4 апрели соли равон шахсони номаълум бо роҳи пинҳонӣ вориди корхонаи коркарди пахтаи ҶДММ “Пахтаи Хатлон” гардида, аз он ҷо 3 ҳазор килограмм пунбадона (чигит) - ро дуздида, аз ҷойи ҳодиса ғайб задаанд. Зарари расондашуда 10 ҳазор сомониро ташкил медиҳад.
Дар натиҷаи гузарондани чорабиниҳои оперативӣ - ҷустуҷӯӣ ба гумони содир намудани ҷинояти дуздӣ марди 58 - солаи сокини ноҳияи Вахш дастгир гардид. Гумонбаршуда ин ҷиноятро бо ҳамроҳии марди 45 - солаи сокини шаҳри Кӯлоб, ки пештар бо моддаи 244 қисми 2 Кодекси ҷиноятии Ҷумҳурии Тоҷикистон суд шудааст, содир намудааст. Аз рӯи далели мазкур парвандаи ҷиноятӣ оғоз гардида, тафтишот идома дорад.
Шикори ғайриқонунии “Марко - поло”
Кормандони милитсия зимни гузарондани чорабиниҳои оперативӣ - ҷустуҷӯӣ сокини ноҳияи Мурғобро барои шикори ғайриқонунии гӯсфанди кӯҳии “Марко - поло” дастгир намуданд.
Дар вақти кофтукови шахсӣ аз гумонбаршуда 6 килограмм гӯшт дарёфт ва мусодира гардид. Назар ба иттилои шуъбаи ҳифзи муҳити зисти ноҳия, гӯшти мусодирашуда ба гӯсфанди кӯҳии “Марко - поло” мансуб буда, зарари расондашуда 160 ҳазор сомониро ташкил медиҳад.
Нисбат ба далели мазкур парвандаи ҷиноятӣ оғоз гардид.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 11.04.2017 №: 74 Мутолиа карданд: 1010
