ҳуқуқ
КОНСТИТУТСИЯ БАРОИ ҶАВОНОН БОЯД КИТОБИ РӮИМИЗӢ БОШАД
Қонуни асосии кишвар, ки дар худ орзуву омоли чандинасраи халқи худогоҳу хештаншиносро баҳри бунёди ҷомеаи адолатпарвар инъикос намудааст, барои устувории соҳибихтиёрӣ, пойдории ваҳдату ҳамдигарфаҳмӣ, суботи сиёсӣ, таъсиси низоми самарабахши мақомоти ҳокимияти давлатӣ, ба миён омадани рукнҳои ҷомеаи шаҳрвандӣ, таҳкими ғояҳои инсондӯстона дар тафаккури ҷомеа, татбиқи асли таҷзияи ҳокимият ва шинохти Тоҷикистон дар арсаи сиёсати ҷаҳонӣ чун субъекти комилҳуқуқи муносибатҳои байналмилалӣ нақши созгору таърихӣ дорад. Бо қабули ин санади олии ҳуқуқӣ давра ба давра ислоҳоти ҳуқуқӣ ва иқтисодию иҷтимоӣ дар кишвар амалӣ гардида, бинобар татбиқи бомароми ҳадафҳои созандаи пешгирифтаи давлату Ҳукумат дар як муддати кӯтоҳ рушди соҳаҳои гуногуни хоҷагии халқ таъмин гардид ва сатҳу сифати зиндагии мардум тадриҷан баланд бардошта шуд.
Дар асоси ислоҳоти ҳуқуқӣ тамоми қонунгузории кишвар тавассути қабули қонунҳои муҳими ба талаботи замони нав ҷавобгӯ такмил ва муқаррароти онҳо ба Конститутсия мутобиқ гардонда шуданд. Ҳамзамон, асли конститутсионии волоияти Конститутсия ва таъмини амали бевоситаи меъёрҳои он дар қаламрави кишвар таъмин гардида, барои дар рӯҳияи эҳтирому риояи қонун рушду такомул ёфтани ҳар фарди ҷомеа заминаи мусоиди ҳуқуқӣ фароҳам оварда шуд. Бо назардошти омилҳои сиёсӣ, иқтисодию иҷтимоии инкишофи давлату ҷомеа, тақвияти заминаҳои бунёдии ваҳдату суботи сиёсӣ дар мамлакат, талаботи муносибатҳои ҷамъиятии рушдёбанда, ташаккули низоми ҳуқуқӣ дар асоси ислоҳоти конститутсионӣ солҳои 1999, 2003 ва 2016 тавассути раъйпурсии умумихалқӣ дар фазои озоду демократӣ ба Конститутсия бо ҷонибдории аксари мардуми кишвар тағйиру иловаҳо ворид шуданд. Иштироки фаъоли ҷомеаи Тоҷикистон дар чорабиниҳои муҳими сиёсӣ, аз ҷумла раъйпурсии умумихалқӣ ба ҷомеаи ҷаҳон маърифати ҳуқуқӣ ва фарҳанги волои сиёсию демократии сокинони мамлакатро нишон дода, собит сохт, ки роҳи интихобкардаи Тоҷикистони ҷавону соҳибистиқлол ба хотири таъмини зиндагии шоиста ва саодати тамоми сокинони кишвар равона гардидааст.
Бо дарки аҳамияти таърихии Конститутсия дар эъмори давлатдории навин ва муҳимияти масъалаҳои он, ки принсипҳои конститутсионӣ бояд дар фаҳмиши инсон маърифати баланди ҳуқуқиро оид ба эҳтиром гузоштан ба ин санади олии ҳуқуқӣ ба миён орад ва насли наврасро дар рӯҳияи эҳтирому риояи арзишҳои конститутсионӣ тарбия ва ба воя расонад, аз ҷониби давлату Ҳукумати кишвар бобати тарғибу ташвиқи васеи меъёрҳои ин ҳуҷҷати муҳим тадбирҳои зарурӣ роҳандозӣ мешаванд.
Ба роҳ мондани омӯзиши ҳатмии Конститутсия дар муассисаҳои таълимӣ, ҳамзамон, барои бархӯрдор будани ҷавонон аз таърихи қабули Конститутсия, аҳамияти муҳими арзишҳои конститутсионии дар он инъикосгардида, ташаккули заминаҳои боварӣ ва эътиқоди насли ҷавон нисбат ба қонун ва сиёсати ҳуқуқӣ, баланд гардидани ҳисси ватандӯстию хештаншиносии онҳо, мустаҳкам кардани асосҳои ҳуқуқии фаъолият ва интизоми ҷавонон, пешгирии ҳуқуқвайронкуниҳо, ҳимояи ҳуқуқу озодиҳо ва манфиатҳои қонуниашон нигаронда шудааст.
Даврон ҲОШИМЗОДА,
судяи Суди конститутсионии
Ҷумҳурии Тоҷикистон, номзади илмҳои ҳуқуқ
Баёни ақида (0) Санаи нашр: 11.04.2017 №: 74 Мутолиа карданд: 1078
