барқияҳо
Барқияҳои табрикии Президенти
Тоҷикистон ба Президенти Ҷумҳурии Исломии Покистон Осиф Алӣ Зардорӣ ва Президенти Ҷумҳурии Ҳиндустон хонум Пратибха Патил
14 август Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Исломии Покистон Осиф Алӣ Зардорӣ барқияи табрикӣ ирсол намуд, ки дар он аз ҷумла омадааст:
Ҷаноби Олӣ,
Боиси сарфарозии ин ҷониб аст, то Ҷаноби Олӣ, давлат ва мардуми Покистонро ба муносибати фаро расидани ҷашни солгарди Иди истиқлоли кишвари дӯст самимона табрик ва таҳният гӯям.
Хушбахтона тайи солҳои охир муносибатҳои Тоҷикистону Покистон густариш ва тавсеа ёфтанд, ки нишонаи возеҳи он сафари расмии Шумо ба Тоҷикистон буд. Ҷумҳурии Тоҷикистон ҷонибдори вусъати тоза пайдо кардани ҳамкориҳои мо дар тамоми заминаҳо ва рушду инкишофи ҳамешагии онҳост, ки ин раванд ба нафъи ҳар ду кишвар ва мардумони он аст. Умедворам, ки ҷиҳати амалӣ шудани тавофуқоти ҳосилшуда ҳар ду ҷониб аз ҳамаи имкониятҳо истифода хоҳанд бурд.
Бо ибрози табрику таҳнияти муҷаддад ба Ҷаноби Олӣ тансиҳатии комилу бардавом ва комёбиву пирӯзиҳои нав ба нав орзумандам. Ба халқи дӯсти Покистон сулҳу субот ва рушду пешрафт таманно дорам.
15 август Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Ҳиндустон хонум Пратибха Патил ба муносибати ҷашни миллӣ – солгарди истиқлоли Ҷумҳурии Ҳиндустон барқияи табрикӣ ирсол намуд, ки дар он аз ҷумла омадааст:
Хонуми Олиҷоҳ,
Табрику таҳнияти самимии мардум ва Ҳукумати Ҷумҳурии Тоҷикистонро бо фарорасии ҷашни миллӣ – солгарди истиқлоли Ҷумҳурии Ҳиндустон қабул фармоед.
Мо шоҳиди дастовардҳои муҳими кишвари Шумо дар арсаҳои гуногуни зиндагии ҷомеа ва ширкати фаъоли он дар ҳамкории минтақавӣ ва байналмилалӣ мебошем.
Боиси қаноатмандист, ки дар солҳои ахир муносиботи дӯстонаи мо бар асари саъю эҳтимом ва кӯшишҳои ҳар ду ҷониб сатҳи баланд ва сифатан навро касб намуд.
Ҷумҳурии Тоҷикистон мӯътақид аст, ки густариш ва тавсеаи ҳамкории васеъ ва бунёдии ду кишвари дӯст ба нафъи мардумони мо ва амнияту суботи минтақа аст. Умедворам, ки сафари қариб-ул-вуқӯи Шумо ба Тоҷикистон ба ин раванд такони ҷиддӣ хоҳад дод.
Бо ибрози таманниёти беҳтарин ба Шумо, хонуми Олиҷоҳ, сиҳатии комил ва комёбиҳои рӯзафзун ва ба мардуми дӯсти Ҳиндустон хушрӯзӣ ва саодат орзумандам.
Баёни ақида (0) Санаи нашр: №: Мутолиа карданд: 7834