ҳуқуқ
ҶИНОЯТ ва ҶАЗО
Ба марги духтарчаи 2 - сола кӣ гунаҳгор?
Духтури навбатдори шуъбаи қабули яке аз беморхонаҳои кӯдаконаи вилояти Суғд ба гумони иҷро накардани вазифаҳои базиммадоштааш дастгир шуд.
Гумонбаршуда 12 - уми марти соли 2017 ҳангоми навбатдориаш, духтарчаи 2 - солаи сокини ноҳияи Бобоҷон Ғафуровро қабул намуда, дар вақти муоинаи тиббӣ муайян кард, ки ӯ гирифтори бемории илтиҳоби шадиди шушҳо ва варами майнаи сар аст. Вале, бар хилофи тартиби муайянгардидаи соҳавӣ, барои бистарӣ намудани кӯдаки хурдсол чора наандешид. Дар натиҷа, духтарча, бинобар сари вақт табобат нагирифтан, 14 - уми март вафот кард.
Аз рӯи далели мазкур парвандаи ҷиноятӣ оғоз гардида, тафтишот идома дорад.
Дуздон ба даст афтоданд
Кормандони милитсия зимни гузарондани чорабиниҳои оперативӣ - ҷустуҷӯӣ ду нафар сокини ноҳияи Рӯдакиро бо гумони содир намудани ҷинояти дуздӣ боздошт карданд.
Муайян карда шуд, ки онҳо 3 - юми апрели соли 2017, пинҳонӣ вориди хонаи истиқоматии сокини Ҷамоати деҳоти Роҳатии ноҳияи Рӯдакӣ шуда, аз дохили ҷевон 1200 сомонӣ ва ҷавоҳироти гуногуни тиллоӣ, ҷамъ ба маблағи 3700 сомониро дуздида, аз ҷойи ҳодиса ғайб задаанд. Ҳамчунин, гумонбаршудаҳо бо ҳамин роҳ шаби 3 - юм ба 4 - уми апрел, аз хонаи истиқоматии сокини ҳамин ноҳия 1500 сомонӣ, ду адад телефони мобилӣ, либосҳои гуногун, ҷамъ ба маблағи 4500 сомониро дуздиданд.
Ба ҳамин монанд, ба мақомоти милитсия марди 23 - солаи сокини пойтахт муроҷиат намудааст, ки моҳи ноябри соли 2016 шахси номаълум вориди хонааш шуда, 16 ҳазор сомониашро дуздидааст. Дар натиҷаи гузарондани чорабиниҳои оперативӣ - ҷустуҷӯӣ гумонбари ҷинояти дуздӣ марди 41 - солаи сокини ноҳияи Тоҷикобод дастгир шуд.
Аз рӯи ин далелҳо парвандаҳои ҷиноятӣ оғоз гардида, тафтишот давом дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 13.04.2017 №: 76 Мутолиа карданд: 981
