ҳуқуқ
ҲАШИШ. ИН ДАФЪА АЗ ДОХИЛИ КАЛӮШ ДАРЁФТ ВА МУСОДИРА ШУД
Кормандони шуъбаи мубориза бар зидди ҳуқуқвайронкуниҳои гумрукии Раёсати минтақавии гумрукӣ дар шаҳри Душанбе ҳангоми гузарондани чорабинии вижаи оперативӣ - ҷустуҷӯӣ дар шаҳри Душанбе сокини 48 - солаи ноҳияи Тоҷикободро дастгир карданд.
Шаҳрванд М. М. ба гумони даст доштан дар муомилоти ғайриқонунии воситаҳои нашъаовар ва ба соҳибияти каси дигар додани онҳо мутаҳам дониста мешавад. Дар вақти азназаргузаронии манзили истиқоматии муваққатии ӯ, воқеъ дар шаҳри Душанбе, кӯчаи А. Ғуломов аз дохили плитаи барқӣ як ҷуфт калӯш, ки дар дохилаш ду адад бастаи селофанӣ мавҷуд буд, дарёфт ва мусодира шуд.
Мувофиқи маълумоти ташхисӣ - судии Раёсати ташхисӣ - криминалистии Вазорати корҳои дохилии Ҷумҳурии Тоҷикистон, дар бастаҳои селофании аз манзили зисти муваққатии шаҳрванд М. М. ёфтшуда, маводи нашъаовари навъи «ҳашиш» ҷойгир карда шудааст, ки вазни умумиаш 906 граммро ташкил медиҳад. Ба гуфтаи гумонбар, ӯ маводи мухаддирро бо мақсади ба соҳибияти каси дигар додан дар манзили истиқоматиаш нигоҳ доштааст.
Аз маркази матбуоти Хадамоти гумруки назди Ҳукумати Ҷумҳурии Тоҷикистон хабар доданд, ки нисбат ба шаҳрванд М. М. барои содир намудани кирдорҳои барқасдона бо аломатҳои моддаи 200 қисми 3, банди «г» - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтишот идома дорад.
Сафаргул АЛИМОВА, «Ҷумҳурият»
Баёни ақида (0) Санаи нашр: 13.04.2017 №: 76 Мутолиа карданд: 1138
