ҳуқуқ
НУРОБОД. ҚОНУНШИКАНИҲО ПЕШГИРӢ МЕШАВАНД
Дар давоми се моҳи соли равон оид ба риоя нагардидани талаботи моддаи 474 - и Кодекси ҳуқуқвайронкунии маъмурӣ ҳашт парванда мавриди баррасӣ қарор гирифта, ба фоидаи буҷети давлат 7440 сомонӣ ҷарима ситонда шуд.
Давлат Қувватов, мудири бахши танзими анъана ва ҷашну маросимҳои миллии ноҳияи Нуробод, бо зикри ин матлаб иброз дошт, ки баҳри дар амал татбиқ намудани Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» дар ноҳия як қатор чорабиниҳо бо иштироки намояндагони шуъбаи корҳои дохилӣ ва дигар сохторҳои дахлдор гузаронда шуданд. Дар натиҷа чор протоколи ҳуқуқвайронкунӣ оид ба риоя нагардидани талаботи қонун тартиб дода шуда, як парванда ба суд ирсол ва се парвандаи дигар мавриди баррасӣ қарор дорад.
Ба иттилои манбаъ, аз ҷониби сархатиби ноҳия дар ҳамаи масҷидҳои ҷомеъ оид ба риояи қонуни танзим, пешгирии гароиши наврасону ҷавонон ба ҳизбу ҳаракатҳои террористию ифротгаро ва дигар равияҳои дар Тоҷикистон мамнуъ эълоншуда чандин суҳбату вохӯриҳои судманд доир гардиданд. Дар ин давра бо иштироки падару модарон, роҳбарони корхонаю муассисаҳо оид ба никоҳи хешутаборӣ ва паёмадҳои манфии он корҳои фаҳмондадиҳию таблиғотӣ роҳандозӣ гардиданд. Инчунин, баҳри иҷрои дастуру ҳидоятҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки аз Паёми навбатиашон ба Маҷлиси Олии мамлакат бармеоянд, аз ҷониби иттиҳодияҳои динӣ ба тарбиятгирандагони мактаб - интернати ҷумҳуриявии ноҳия, ятимон, бепарасторон ва оилаҳои камбизоат ба маблағи 10225 сомонӣ кумаки моддӣ расонда шуд. Дар филиали ҶСК «Агроинвестбонк» барои 17 нафар ятими кулл суратҳисоб кушода шудааст, ки то ҳол ба ҳар яки он 1973,1 сомонигӣ рост меояд. Ҳамзамон, аз ҷониби ду соҳибкори маҳаллӣ ба кӯдакони оилаҳои камбизоат ва бепарастор ба маблағи 5900 сомонӣ ва ба 35 нафар аз оилаҳои ниёзманд ёрии моддии яквақтаина расонда шуд.
- Мақомоти иҷроияи маҳаллии ҳокимияти давлатии ноҳияи Нуробод дар ҳамдастӣ бо фаъолони ноҳия барои роҳ надодан ба қонуншиканиҳо, риояи ҳатмии муқаррароти Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» ва ислоҳи камбудиҳои ҷойдошта маҷмӯи чорабиниҳои таҳияшударо дар амал татбиқ намуда истодааст, - иброз дошт Давлат Қувватов.
Гулнисои САЪДОНШО, «Ҷумҳурият»
Баёни ақида (0) Санаи нашр: 14.04.2017 №: 77 Мутолиа карданд: 1074