ҳуқуқ
ҶИНОЯТ ва ҶАЗО
Дуздии шиноснома ва маблағу тилловориҳо
Ба ШВКД - 1 дар ноҳияи Фирдавсӣ сокини шаҳри Душанбе муроҷиат намуд, ки моҳи октябри соли 2016 шахси номаълум бо тариқи пинҳонӣ вориди хонаи истиқоматии духтараш шуда, аз он ҷо панҷ адад шиносномаи миллӣ ва хориҷӣ, 400 доллар, 1 200 сомонӣ ва ҷавоҳироти гуногуни тиллоӣ, ҷамъ ба маблағи 4 ҳазору 600 сомониро дуздида, аз ҷойи ҳодиса ғайб задааст.
Зимни гузарондани чорабиниҳои оперативӣ - ҷустуҷӯӣ аз ҷониби кормандони милитсия сокини ноҳияи Ҷалолуддини Балхӣ бо гумони содир намудани ҷинояти дуздии мазкур дастгир шуд.
Аз рӯи далели мазкур парвандаи ҷиноятӣ оғоз гардид.
Суистифода аз боварии шаҳрвандон
Кормандони милитсия марди 40 - солаи сокини ноҳияи Бобоҷон Ғафуровро бо гумони содир намудани ҷинояти қаллобӣ дастгир намуданд. Гумонбаршуда, моҳи декабри соли 2016 аз сокини ҳамин ноҳия 20 ҳазор доллар гирифта, ба манфиати шахсиаш сарф кардааст.
Ҳамчунин, оид ба ҳодисаи қаллобӣ сокини ноҳияи Файзобод ба мақомоти милитсия муроҷиат намудааст, ки соли 2015, сокини шаҳри Душанбе 5 ҳазору 800 долларашро гирифта, бозпас нагардондааст.
Ба ин монанд, зани 31 - солаи сокини шаҳри Душанбе муроҷиат намудааст, ки соли 2008 сокини ҳамин шаҳр бо роҳи фиреб ба бовариаш даромада, аз ӯ 16 ҳазор доллар ва 135 грамм ҷавоҳироти тиллоиашро гирифта, маблағашро то ҳол барнагардондааст.
Вобаста ба далелҳои мазкур парвандаҳои ҷиноятӣ оғоз гардида, тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 17.04.2017 №: 78 Мутолиа карданд: 1226
