ҳуқуқ
МАНЪИ РИШУ ҲИҶОБ ДАР ЧИН
Дар вилояти Шинҷон - Уйғури Ҷумҳурии Мардумии Чин аз 1 апрели соли равон ба мардон гузоштани риши дарози ғайрисуннатӣ ва ба занҳо дар ҷойҳои ҷамъиятӣ пӯшидани либосе, ки рӯяшонро маҳкам мекунад, манъ шудааст.
Дар ин росто, парлумони вилояти Шинҷон - Уйғур 29 март қонунеро қабул кард, ки барои мусулмонони сокини ин вилояти ҳаммарз бо Тоҷикистон як силсила маҳдудиятҳои нав ҷорӣ мекунад. Дар қонун, ки аз 1 апрел мавриди амал қарор гирифт, як қатор аломатҳое номбар шудаанд, ки ба ақидаи мақомоти Чин, пайрави равияҳои тундрави мазҳабӣ будани касро собит месозанд.
Ҳамин тавр, ба мақомот дастур дода шудааст, то “Занонеро, ки либосашон рӯи онҳоро мепӯшонад ба фурудгоҳҳо, истгоҳҳои роҳи оҳану автобус роҳ надиҳанд ва дар бораи чунин афрод пулисро огоҳ созанд.” Дар асоси ин қонун, ҳамчунин, мусулмонони сокини Шинҷон бояд ба хотири наздик кардани худ ба ҳаёти дунявӣ радио ва телевизионҳои давлатиро гӯш ва тамошо кунанд ва дар чорабиниҳои ҷамъиятӣ фаъолона ширкат варзанд. Мувофиқи қонуни мавриди амал қароргирифта, издивоҷ бо никоҳи мусулмонӣ ба ҷои никоҳи расмии қонунӣ дар ҳудуди вилоят ва ба фарзандон гузоштани номҳое, ки ба мазҳаб ташвиқ мекунанд, манъ шудааст. Волидон минбаъд барои бо далелҳои мазҳабӣ ба мактаб намондани фарзандонашон тибқи қонун муҷозот хоҳанд шуд. Онҳо бар асоси ин қонун муваззаф мешаванд, то ба фарзандони худ омӯзиши илмҳои дунявиро ташвиқ карда, онҳоро ба ваҳдати миллӣ ва мубориза алайҳи ифротгароӣ даъват кунанд.
Қонун барои ҷалби фарзандон ба фаъолиятҳои мазҳабӣ ба волидон ҳукми зиндонро пешбинӣ мекунад ва фарзандони онҳоро давлати Чин ба тарбияи худ гирифта, барои ислоҳ ба урдугоҳҳои махсус мефиристад. Қонуни ахир дар пайи нашри гузоришҳоест, ки теъдоди сокинони Шинҷон дар сафи гурӯҳҳои ифротӣ дар Сурияву Ироқ ба 5 ҳазор нафар расидааст.
Иброҳими СУЛТОН
Баёни ақида (0) Санаи нашр: 17.04.2017 №: 78 Мутолиа карданд: 1119
