маориф
ТОҶИКОБОД. САФИ ДОНИШҶӮДУХТАРОН МЕАФЗОЯД
Квотаи президентӣ имкон додааст, ки духтарони деҳоти дурдаст дар муассисаҳои олии ҷумҳурӣ таҳсил намоянд. Шумораи духтарони донишҷӯи ноҳияи Тоҷикобод сол ба сол афзоиш меёбад. Дар натиҷаи тадбирҳои андешидаи Ҳукумати ҷумҳурӣ бобати дастгирии духтарони деҳот норасоии мутахассисон аз ин ҳисоб дар ноҳия бартараф мегардад.
Имрӯзҳо дар маркази миллии тестии ноҳияи Рашт ва нуктаҳои сайёри он дар навоҳии водӣ ба маъракаи қабули дов-талабон идома меёбад.
Ба иттилои мудири шуъбаи маорифи ноҳияи Тоҷикобод Зебо Ҳимматова ба маркази миллии тестии ноҳия то имрӯз 210 нафар ҳуҷҷат супурдааст, ки аз ин 26 нафарро духтарон ташкил медиҳанд.
Соли хониши 2015 - 2016 муас-сисаҳои таълимии ноҳияро 547 нафар хонанда (аз ҷумла 189 духтар) хатм намуда, ба муассисаҳои таҳсилоти олӣ 133 нафар (18 духтар), ба муассисаҳои таҳсилоти миёнаи касбӣ 43 нафар (5 духтар) ва 119 нафар ба коллеҷу курсҳои кӯтоҳмуддат дохил шуданд.
Дар асоси роҳхати Вазорати маориф ва илми Ҷумҳурии Тоҷикистон 42 нафар хатмкунандаи Донишгоҳи давлатии омӯзгории Тоҷикистон ба номи Садриддин Айнӣ, Донишкадаи давлатии забонҳои Тоҷикистон ба номи Сотим Улуғзода ва Донишкадаи омӯзгории ноҳияи Рашт ба мактабҳои ноҳия фиристода шуданд, ки ин амал то андозае норасоии муаллимони ихтисосмандро коҳиш дод. Дар Донишкадаи омӯзгории ноҳияи Рашт 187 нафар донишҷӯ, аз ҷумла 38 нафар духтар ва дар коллеҷи омӯзгории шаҳраки Навободи ноҳияи Рашт 63 нафар, аз ҷумла, 6 нафар духтар аз ноҳияи Тоҷикобод таҳсил доранд.
Аз соли 1996 то ин дам 326 нафар, аз ҷумла 166 нафар духтар макотиби олиро тибқи квота хатм намудаанд. Айни замон, дар муассисаҳои таҳсилоти олии кишвар тариқи квота 46 нафар духтар аз ноҳияи Тоҷикобод таҳсил дорад. Имсол низ тибқи нақшаи квотавӣ барои духтарони ноҳия 11 ҷой ҷудо гардидааст.
Дилшод АМИРОВ, «Ҷумҳурият»
Баёни ақида (0) Санаи нашр: 19.04.2017 №: 80 Мутолиа карданд: 1510
