номаҳо
МАКТАБИ № 39 БА ТАЪМИР НИЁЗ ДОРАД
Тавре маълум аст, дар замони Истиқлолияти давлатӣ ба соҳаи маориф таваҷҷуҳи махсус зоҳир гардид. Дар ин замина мактабҳои зиёд бо шароитҳои хуби замонавӣ ҳам барои таълим ва ҳам барои тарбияи ҷисмонии насли наврас бунёд шудаву мавриди истифода қарор гирифтанд. Афзалияти аксар муассисаҳои нави таълимӣ дар он аст, ки толор ва майдончаҳои варзишии ҳозиразамон доранд. Татбиқи чунин иқдомҳо, албатта, таваҷҷуҳи мактаббачаҳоро ба ин муассисаҳо бештар намуда, шавқи онҳоро меафзояд, ки нишон аз ояндаи дурахшон аст.
Бо вуҷуди ин, мактабҳое низ ҳастанд, ки ҳанӯз ҳам дар онҳо одитарин шароитҳо муҳайё набуда, завқи ҷавононро ба соҳаи варзиш бедор накарда, мекушанд. Бешубҳа, метавон толори варзиши муассисаи таҳсилоти миёнаи умумии № 39 - и шаҳри Кӯлобро далел овард. Вақти боздид аз толори варзиши муассисаи мазкур кас дар ҳайрат меафтад. Ҳама ҷо вайрону валангор, деворҳои бино рангпаридаю дар ҳолати садамавӣ мебошанд. Он рӯ ба нестӣ овардан дорад.
Сафармо Кӯчарова, мудири ин муассисаи таълимӣ, ҳангоми суҳбат гуфт: «Аз ин толори варзиш ҳамагон, яъне масъулон огоҳанд. Аз соли 1987 то инҷониб боре рӯйи таъмирро надидааст. Дар мактаб аз ду деҳа: Чапаев ва Сарёзии Боло дар маҷмӯъ 732 нафар хонандагон ба таълим фаро гирифта шудаанд. Барои таъмири ҷории толори варзиш ва маҷлисгоҳи ин муассисаи таълимӣ чанд маротиба муроҷиат кардем, аммо ҳеҷ натиҷаи мусбате надод».
Ҳамин тавр, толори маҷлисгоҳи муассиса низ, ки дар ошёнаи дуюм мебошад. Он ба пуррагӣ аз истифода баромадааст. Ба андешаи мутасаддиён барои таъмири чунин толорҳо маблағи калон зарур аст.
- Борҳо аз тариқи "оинаи нилгун" чунин ҳол доштани толори варзиш ва маҷлисгоҳи муассисаро намоиш дода буданд. Вақти боришот аз бомаш об чунон мерезад, ки ба ошёнаи аввал низ зарараш мерасад, - гуфт Эмомалӣ Раҳимов, мудири хоҷагии мактаб.
Пас, чӣ бояд кард? Ба ин пурсиш кӣ посухи дуруст медиҳад ва масъаларо ҳамчунон ҳал менамояд?
Исломи РАҶАБАЛӢ, шаҳри Кӯлоб
Баёни ақида (0) Санаи нашр: 26.04.2017 №: 85 Мутолиа карданд: 2163
