ҳуқуқ
ИНТЕРНЕТ – КАФЕ. ДИГАР БА ОН НИЁЗ НЕСТ
Паҳн намудани филмҳои ғайриахлоқӣ ва бозиҳои дорои хусусияти зӯроваридошта, бахусус тавассути шабакаҳои иҷтимоӣ дар ҷомеаи имрӯзи мо яке аз масъалаҳои нигаронкунанда ва дар айни замон ҳалталаб аст. Зеро он, пеш аз ҳама, ба тарбияи ҳуқуқӣ, ахлоқиву маънавии насли ҷавони кишвар таъсири манфӣ дорад.
Бо вуҷуди роҳандозии корҳои зиёди фаҳмондадиҳӣ, баргузории мулоқоту вохӯриҳо бо омӯзгорон ва падару модарон, ҳанӯз ҳам ҳолатҳои то бевақтиҳои шаб дар марказҳои дилхушию интернет-кафеҳо ба бозиҳои компютерӣ машғул гардидани шумораи зиёди ноболиғон ба назар мерасад. Масъулони Вазорати корҳои дохилӣ дар ин самт чораҳои зарурӣ андешида, фаъолияти баъзе марказҳои дилхуширо, ки бидуни ҳуҷҷатҳои барасмиятдарорӣ кор мекарданд, қатъ намуданд. Вале, соҳибони як қатор марказҳои интернетӣ, ки ба бозиҳои хусусияти зӯроваридошта машғуланд, фаъолияти худро пинҳонӣ идома дода истодаанд.
Ба гуфтаи равоншинос Сайфиддин Расулов, агар ба панҷ соли пеш назар афканем, дар ҳақиқат мо ба чунин марказҳо ниёз доштем. Аммо, дар шароити кунунӣ, вақте корхонаю муассиса, ташкилоту идора, китобхона ва дигар ҷойҳои ҷамъиятӣ бо интернет пайвастанд, ниёз ба интернет - кафеҳо намондааст. Метавон гуфт, ки ҳатто микроавтобусҳо (wi-fi), телефону компютерҳои хона ва корхонаҳо бо интернет таъмин ҳастанд. Вақти он расидааст, ки дар ҳамкорӣ бо мақомоти марбута фарзандонро аз хатари видео ва бозиҳои барои наврасон мамнуи кампютерӣ эмин дорем.
Дар робита ба ин, Файзиддин Назаров, сардори шуъбаи ноболиғони Вазорати корҳои дохилӣ, гуфт, ки бо мақсади пешгирӣ намудани ҳуқуқвайронкуниҳои маъмурӣ ва ҷиноятӣ аз ҷониби кормандони дигар мақомоти дахлдор, воҳидҳои кор бо ноболиғон ва ҷавонон рейдҳои муштарак ва амалиётҳои вижа тақрибан ҳар рӯз гузаронда мешаванд. Зимни як санҷиш маълум шуд, ки аз 72 маркази дилхушӣ дар шаҳри Душанбе, аксарият ҳуҷҷати тасдиқкунанда надоранд. Онҳое, ки ҳуҷҷат доранд, ҳамчун марказҳои интернетӣ худро муаррифӣ кардаанд. Марказҳои компютерӣ низ бояд бозиҳои муайянеро истифода баранд, ки аз ҷониби идораи «Тоҷиккино» иҷозат дода шудааст. Мутаассифона, онҳо аз сомонаҳое истифода мебаранд, ки иҷозати воридшавиашон манъ шудааст. Наврасоне, ки вориди интернет-кафеҳо мегарданд, ба бозиҳои хусусияти зуроварӣ ва экстремистию террористидошта (констрайт) машғул мешаванд. Ин гуна бозиҳо наврасонро аз олами воқеӣ ба олами хаёлӣ (виртуалӣ) мебарад, ки ба манфиати ҷомеа ва насли наврас нест.
Воқеан, ба андешаи равоншиносон дар ҳолати пайваста машғул шудан ба бозиҳои компютерӣ наврасон ба он вобаста мегарданд, ки ин оқибати ногувор дорад.
Пас набояд дар пешгирии чунин як ҳолати номатлуб бетараф бошем, то фардо дер нашавад.
Сафаргул АЛИМОВА, “Ҷумҳурият”
Баёни ақида (0) Санаи нашр: 03.05.2017 №: 90 Мутолиа карданд: 1245
