маориф
РАДИОИ ТАЪЛИМӢ
Факултаи журналистикаи Донишгоҳи миллии Тоҷикистон яке аз марказҳои муҳими омода намудани кадрҳои соҳа ба ҳисоб меравад, ки дар он ба тарбияи кадрҳои миллӣ барои радио ва телевизион диққати махсус зоҳир мегардад. То имрӯз садҳо хатмкардагони ин даргоҳ дар ҷодаи радио фаъолияти самаранок доранд.
Студияи таълимии телевизион ва радио 1 сентябри соли 2011 ташкил шудааст, ки ҳамчун озмоишгоҳи таълимии кафедраи телевизион ва радио ҳам хидмат мекунад. Зафар Эшматов, собиқ мудири кафедраи телевизион ва радио, тайи солҳои 2011 - 2015 дар ободии студияи таълимии телевизион ва радио саҳми назаррас дорад.
Аз соли 2015 инҷониб сарварии студия ба ассистенти кафедраи мазкур Муслима Манонова вогузор карда шуд.
Студияи мазкур дорои дафтарҳои алоҳидаи корӣ барои танзим ва сабти овоз, хулоса дорои тамоми шароити ҳозиразамон буда, бо техникаву технологияи навтарин таҷҳизонида шудааст. Соли 2015 студияи телевизион ба фаъолият пардохт, ки он минбари донишҷӯёни факултет ба ҳисоб меравад. Барномаҳои он ҳамарӯза аз соати 830 то 1600 дар 10 - дақиқаи байни дарсҳо пахш мешаванд. Бахшҳои “Ибрози назар”, “Дар фазои кушод”, “Андарзи рӯз”, “Дар меҳмонӣ”, “Баҳси рӯз”, “Мушкилоти донишҷӯ” байни бинандагон мухлисони зиёде доранд.
Студияи радио бошад, аз 13 феврали соли 2017 ба фаъолият пардохт. Донишҷӯён дар таҳияи барномаву бахшҳои ҷолиб саҳм мегиранд. Номгӯйи барномаҳое, ки шунавандагони бештар доранд “Баҳси донишҷӯ”, “Субҳи донишгоҳи ман”, “Маслиҳатҳои муфид”, “Китоби дӯстдоштаи ман”, “Ҷовидон” ва монанди инҳо мебошанд, ки дар танаффуси байни дарсҳо пахш мегарданд.
Имрӯзҳо студияи радио нисбат ба телевизион фаъолияти пурсамар дорад, зеро донишҷӯён дар ин самт корро хуб аз худ карда, мустақилона фаъолият менамоянд. Донишҷӯён барномаҳои худро дошта, дар омода намудан, сабт ва пахши онҳо саҳм мегиранд. Ягона мушкили студия нарасидани мутахассисони техникӣ мебошад, ки умед аст рӯзҳои наздик ҳалли худро ёбад.
Лола РИЗОЕВА, “Ҷумҳурият”
Баёни ақида (0) Санаи нашр: 12.05.2017 №: 96 Мутолиа карданд: 1656
