ҳуқуқ
САРҲАД. МУСОДИРАИ БЕШ АЗ 72 КИЛОГРАММ МАВОДИ НАШЪАОВАР ДАР ЯК МОҲ
Дар давоми як моҳи соли ҷорӣ дар сарҳади Ҷумҳурии Тоҷикистон бо Ҷумҳурии Исломии Афғонистон 2 маротиба даргирии мусаллаҳона ба амал омада, марзбонони тоҷик аз 32 мавриди кӯшиши убури ғайриқонунии марз пешгирӣ карданд.
Муҳаммад Улуғхоҷаев, роҳбари маркази матбуоти Қӯшунҳои сарҳадӣ, бо тасдиқи ин хабар, ба мо иттилоъ дод, ки моҳи апрел хизматчиёни ҳарбии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар ҳамдастӣ бо дигар мақомоти қудратии мамлакат аз қочоқчиён ба миқдори 72 килограмму 412 грамм маводи нашъаовар дарёфт ва мусодира намуданд. Дар натиҷаи ҳафт амалиёти муштараки марзбонон аз қочоқчиён 3 адад яроқи оташфишон ва 171 дона тири қутраш гуногун, 1 адад норинҷаки РГД - 5 ва дигар лавозимоти ҷангӣ дарёфту мусодира шуд.
Дар ин давра 42 нафар вайронкунандаи марз ва дар гузаргоҳҳои сарҳади давлатӣ 81 нафар боздошт гардида, ба мақомоти дахлдор супурда шуданд. Ду нафар ба далели риоя накардани қоидаҳои будубоши шаҳрвандони хориҷӣ аз ҷумҳурӣ хориҷ шуда, 2 тани дар кофтуков қарордошта дастгир гардид.
Ин дар ҳолест, ки аз ибтидои соли равон то кунун дар маҷмӯъ қочоқчиёни маводи мухаддир бо марзбонони тоҷик 12 маротиба вориди даргирии мусаллаҳона шуда, дар натиҷа ҳашт қочоқчӣ безарар гардонда шудааст.
Зимнан, дар ҷаласаи ҷамъбастии фаъолияти хизматӣ - ҷангӣ дар моҳи апрели соли равон, ки дар Қӯшунҳои сарҳадии Кумитаи давлатии амнияти миллӣ баргузор гашт, ҳифзи дастовардҳои Истиқлолияти давлатӣ, таъмини амният, суботу оромии ҷомеа, роҳ надодани гурӯҳҳои террористиву ифротӣ ба хоки Тоҷикистон рисолати асливу фаъолияти меҳварии марзбонон арзёбӣ гардид. Фармондеҳи Қӯшунҳои сарҳадӣ Раҷабалӣ Раҳмоналӣ, таъкид намудааст, ки бо назардошти вазъи мураккаб ва босуръат тағйирёбандаи ҷаҳони муосир ва авзои ноороми минтақа дар таҳкими ҳифзи сарҳад чораҳои бетаъхир андешида шаванд.
Ф. ҶУМЪАЕВ, “Ҷумҳурият”
Баёни ақида (0) Санаи нашр: 19.05.2017 №: 101 Мутолиа карданд: 1342