ҳуқуқ
Маводи мухаддир ҳамкориҳо дар самти мубориза тақвият меёбанд
Таҷрибаи Ҷумҳурии Тоҷикистон дар соҳаи мубориза бо муомилоти ғайриқонунии маводи мухаддир дар заминаи ҳамкориҳои ҳамоҳангшуда ва боварии мутақобилаи сохторҳои зиддимухаддиротии кишварҳои минтақа асос ёфтааст.
Ин нуктаро Шерхон Салимзода, директори Агентии назорати маводи нашъаовари назди Президенти Ҷумҳурии Тоҷикистон, дар Конфронси 34-уми байналмилалии мубориза бар зидди маводи мухаддир (IDEC XXXIV), ки чанде пеш дар шаҳри Пуанта Канаи Ҷумҳурии Доминикан баргузор гардид, баён намуд.
Бино ба иттилои маркази матбуоти агентӣ, дар ин ҳамоиши сатҳи баланд, ки намояндагони воломақоми ниҳодҳои зиддимухаддиротии як қатор кишварҳои ҷаҳон, назири Федератсияи Русия, Ҷумҳурии Мардумии Чин, Иёлоти Муттаҳидаи Амрико, Ҷопон, Канада, Колумбия, Австралия иштирок доштанд, Шерхон Салимзода оид ба сиёсати зиддимухаддиротии Ҳукумати Тоҷикистон маълумоти муфассал пешниҳод кард.
Директори агентӣ мубориза бо гардиши ғайриқонунии маводи мухаддирро яке аз ҷузъҳои муқобала бо ҷиноятҳои муташаккили фаромиллӣ, аз ҷумла терроризми байналмилалӣ арзёбӣ намуда, таваҷҷуҳи иштирокдорони ҳамоишро ба иқдом ва дастовардҳои кишвар дар соҳаи мубориза бо маводи мухаддир ҷалб сохт. Мавсуф таҳким ва рушди ҳамкориҳои байналмилалӣ, аз ҷумла амалҳои ҳамоҳангшудаи ҷонибҳои манфиатдор ва созмонҳои байналмилалиро ба мақсад мувофиқ донист.
Дар Конфронси байналмилалии мубориза бар зидди маводи мухаддир ба саҳми Тоҷикистон дар мубориза бар зидди муомилоти ғайриқонунии маводи нашъаовар баҳои баланд доданд.
Сафаргул АЛИМОВА, «Ҷумҳурият»
Баёни ақида (0) Санаи нашр: 26.05.2017 №: 105 Мутолиа карданд: 1140
