ҳуқуқ
ПУРСИШ ва ПОСУХ
Ба савол Фарҳод ТОИРОВ , менеҷери департаменти муносибат ва ҳимояи Ташкилоти ҷамъиятии Ассотсиатсияи миллии занони соҳибкори Тоҷикистон ҷавоб дод. Зимнан, агар хонандагони гиромӣ пурсише доранд, метавонанд бо телефони 238-54-16 ба мо муроҷиат намоянд.
- Нуҳ сол боз дар манзили истиқоматие, ки аз як нафар харида будам, бо аҳли оилаам зиндагӣ мекунам. Моҳи феврали соли равон шахси ношиносе ба ман муроҷиат карда, шартномаи харидуфурӯши дар идораи нотариалӣ расман тасдиқшударо пешниҳод намуд ва талаб кард, ки хонаро холӣ намоям. Инчунин барои истифодаи манзили истиқоматӣ дар давоми нуҳ сол иҷорапулӣ пардозам. Бигӯед, ки дар ин ҳолат ман ҳуқуқҳои худро чӣ тавр ҳифз намоям?
С. Қурбоналӣ, сокини ноҳияи Бохтар
- Аз меъёрҳои муқаррарнамудаи Кодекси граждании Ҷумҳурии Тоҷикистон бармеояд, ки шартномаи харидуфурӯши манзили истиқоматӣ характери консенсуалӣ дорад, яъне аз лаҳзаи гирифтани маблағи арзиши манзил аз тарафи фурӯшанда ва қабули манзили истиқоматӣ аз тарафи харидор шартнома иҷрошуда ба ҳисоб меравад. Агар шумо маблағи арзиши манзили истиқоматиро ба фурӯшанда дода, хонаро ба соҳибияти худ қабул карда бошед, он гоҳ ҳуқуқи моликиятиатон нисбат ба ин манзил ба вуҷуд омадааст ва бояд тибқи қонун ҳифз карда шавад. Яъне, шумо дар бораи беэътибор донистани шартномаи харидуфурӯши манзили истиқоматиатон, ки байни шахсони дигар ба расмият дароварда шудааст, ба суд бо даъво муроҷиат менамоед.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 29.05.2017 №: 106 Мутолиа карданд: 1226
