ҳуқуқ
МАШҚҲОИ ЗИДДИТЕРРОРИСТӢ ДАР ДУШАНБЕ
31 май дар шаҳри Душанбе дар доираи Барномаи ҳамкории давлатҳои аъзои Иттиҳоди Давлатҳои Мустақил оид ба мубориза бар зидди терроризм, экстремизм ва дигар ҷиноятҳои хусусияти зӯроваридошта барои солҳои 2017 - 2019, ҷамъомади навбатии ҳайати роҳбарикунандаи сохторҳои зиддитеррористии мақомоти амният ва хадамоти махсуси кишварҳои аъзои ИДМ баргузор гардид.
Зикр гашт, ки марҳалаи аввали машқҳои зиддитеррористии «Душанбе - Зиддитеррор - 2017» рӯзҳои 23 - 26 май дар ҳудуди ҷумҳуриҳои Арманистон, Беларус, Қазоқистон, Қирғизистон, Федератсияи Русия ва Тоҷикистон таҳти роҳбарии ситоди Маркази зиддитеррористии ИДМ баргузор шуданд. Ин марҳала ҷараёни ҳамкории хадамоти махсуси кишварҳои ИДМ дар мубориза алайҳи ҷинояткорони байналмилалӣ, пайдо кардан, пешгирӣ намудани эмиссарони гурӯҳҳои байналмилалии террористӣ дар шабакаҳои иҷтимоӣ, гирифтани пеши роҳи ҷалби шаҳрвандон ба гурӯҳҳои террористӣ тавассути шабакаҳои интернетӣ, огоҳсозии кишварҳо зимни сар задани хатарҳои террористӣ ва дигар паҳлуҳои ҳамкорӣ дар бахши амният ва бехатариро дарбар мегирад.
Дар ҳамоиш натиҷаҳои марҳалаи якуми амалиёти якҷояи мақомоти дахлдори зиддитеррористии кишварҳои ИДМ таҳти шиори «Душанбе - Зиддитеррор - 2017» ҷамъбаст гардида, дар марҳалаи дуюми амалиёти машқҳои зиддитеррористӣ бо истифода аз неруҳои ҳарбӣ озод намудани гаравгонҳо ва безарар гардондани террористони шартӣ дар иншооти муҳими давлатӣ дар назар аст.
Дар доираи ҷамъомади Душанбе мулоқоти роҳбарияти Маркази зиддитеррористии кишварҳои аъзои ИДМ, Кумитаи давлатии амнияти миллии Ҷумҳурии Тоҷикистон ва ҳайати фармондеҳии округи ҳарбии марказии Қувваҳои Мусаллаҳи Федератсияи Русия бо намояндагони воситаҳои ахбори омма пешбинӣ гардидааст.
Сафаргул АЛИМОВА, «Ҷумҳурият»
Баёни ақида (0) Санаи нашр: 01.06.2017 №: 109 Мутолиа карданд: 1248
