ҳуқуқ
МАРЗБОНӢ. ҚӮШУНҲОИ САРҲАДӢ ИҚТИДОРИ БЕШТАР КАСБ МЕКУНАНД
- Қӯшунҳои сарҳадии Кумитаи давлатии амнияти миллии Ҷумҳурии Тоҷикистон ҳамчун сохтори муназзаму муташаккил ва боэътимод ҳифзи марзи беш аз 4000 километраи Тоҷикистонро бо чор давлати ҳаммарз ба уҳда дорад. Ин ниҳод аз оғози фаъолият то кунун дар ҳимояи сохти конститутсионӣ, ҳифзи марзу бум, пешгирии қочоқи маводи мухаддир, силоҳи оташфишон, молҳои саноатӣ, қонуншиканиҳои сарҳадӣ корҳои зиёде анҷом додааст.
Ин матлабро Саймумин Ятимов, раиси Кумитаи давлатии амнияти миллии Ҷумҳурии Тоҷикистон, дар ҳамоиши тантанавие бахшида ба бисту сеюмин солгарди таъсиси Қӯшунҳои сарҳадии КДАМ баён дошт. Дар чорабиниҳои идона, ки рӯзи 27 май нахуст дар яке аз қисмҳои низомии Қӯшунҳои сарҳадӣ дар шаҳри Душанбе оғоз гардида, дар толори «Кохи шараф» - и маркази таълимии «Пойтахт» идома ёфт, ёрдамчии Президенти Ҷумҳурии Тоҷикистон оид ба масъалаҳои амнияти миллӣ Шералӣ Хайруллоев иштирок намуда, афсарону сарбозонро ба муносибати рӯзи таъсиси Қӯшунҳои сарҳадӣ табрик намуд. - Ҳукумат ва мардуми қадршиноси тоҷик афсарону аскарони шуҷоъро, ки дар солҳои ҷанги шаҳрвандӣ ва замони осоиштаи соҳибистиқлолӣ қаҳрамонӣ нишон дода, дар муҳофизати марзу буми кишвар ҷоннисорӣ кардаанд, фаромӯш намекунад ва ному хотираи неки онҳоро пос медорад, - изҳор дошт Шералӣ Хайруллоев.
Худи ҳамон рӯз дар яке аз қисмҳои ҳарбии шаҳри Душанбе маҷмааи варзишӣ барои 300 нафар ба истифода дода шуд, ки аз майдонҳои теннис, волейбол, футбол, монеаҳои варзишию муҳандисӣ, ҳаммом ва нуқтаҳои истироҳатӣ иборат буда, бо лавозимоти ҳарбӣ - варзишӣ таъмин мебошад.
Иттилоъ дода шуд, ки дар давоми фаъолият аз ҷониби марзбонони тоҷик 11 382 вайронкунандаи низоми сарҳадӣ дастгир гардида, 503 амалиёти фаврӣ - оперативӣ гузаронда шудааст. Бо қочоқчиёну марзшиканон 372 задухӯрди мусаллаҳона ба миён омада, 619 нафар безарар, 135 нафар захмдор ва 548 нафари дигар ҳамчун ҷинояткор дастгир шудааст.
Хизматҳои сарҳадчиён ҳамеша қадр мешавад. Аз ҷумла, солҳои 2012 - 2016 бо дастгирии Асосгузории сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 100 нафар марзбон бо манзили истиқоматӣ таъмин гардид. Соли ҷорӣ маркази таълимии «Пойтахт», бинои таълимии сеошёна бо таҳхонааш, як қасри бошукӯҳи фарҳангӣ ва синфхонаҳои соҳавӣ мавриди истифода қарор гирифтанд.
Дар рӯзи Қӯшунҳои сарҳадӣ афсарону сарбозоне, ки дар рафти хизмат ба натиҷаҳои назаррас ноил гаштаанд, бо медалу нишонҳои сарисинагӣ, рутбаҳои навбатии ҳарбӣ, ифтихорнома ва туҳфаҳои хотиравӣ сарфароз гардиданд.
Бузургмеҳри БАҲОДУР, «Ҷумҳурият»
Баёни ақида (0) Санаи нашр: 01.06.2017 №: 109 Мутолиа карданд: 1395
