ҳуқуқ
"КӮКНОР-2017". АМАЛИЁТ ТО 30 НОЯБР ИДОМА МЕЁБАД
Қарори раиси шаҳри Душанбе Рустами Эмомалӣ аз 25 майи соли 2017 «Дар бораи гузарондани амалиёти «Кӯкнор - 2017» ба тасвиб расид, ки то 30 ноябри соли ҷорӣ идома меёбад.
Дар ин бора аз Раёсати иттилоот ва робитаҳои хориҷии дастгоҳи раиси шаҳри Душанбе иттилоъ доданд. Дар асоси қарори раиси шаҳр раёсатҳои Вазорати корҳои дохилӣ, Кумитаи давлатии амнияти миллӣ, Агентии назорати давлатии молиявӣ ва мубориза бо коррупсия дар шаҳри Душанбе якҷо бо Ситоди шаҳрӣ гурӯҳҳои оперативӣ - ҷустуҷӯиро барои муоинаи заминҳои ҳудуди пойтахт таъсис доданд.
Тибқи қарори мазкур бо мақсади ҳамоҳангсозии фаъолияти мақомоти ҳифзи ҳуқуқ ва дигар сохторҳои дахлдори шаҳрӣ оид ба ошкору нобуд кардани рустаниҳои нашъаовари худрӯй, тақвият бахшидан ба мубориза бар зидди муомилоти ғайриқонунии воситаҳои нашъаовар дар шаҳри Душанбе нигаронда шудааст. Бо мақсади таъмини назорат ва ҳамоҳангсозии фаъолият оид ба ташкил ва гузарондани амалиёти «Кӯкнор-2017» Ситоди шаҳрӣ таъсис дода шудааст.
Бар пояи қарори раиси шаҳр Ситоди шаҳрӣ ҳар се моҳ ҷамъ омада, рафти амалиёт, масъалаҳои ошкору пешгирӣ ва нобуд сохтани рустаниҳои нашъаовар, ба ҷавобгарӣ кашидани шахсони ба харидуфурӯши ғайриқонунии маводи мухаддир, моддаҳои психотропӣ ва прекурсорҳо машғулро мавриди баррасӣ қарор медиҳад.
Рустами Эмомалӣ раисони ноҳияҳои шаҳри Душанбе ва аҳли ҷомеаро муваззаф кардааст, ки оид ба ташкил ва гузарондани амалиёти мазкур якҷо бо мақомоти корҳои дохилии ноҳияҳо ва ниҳодҳои худфаъолияти ҷамъиятӣ чораҳои муассир андешанд. Тибқи ин қарор Ситоди шаҳрӣ бояд аз натиҷаи фаъолият ва чораҳои андешидашуда дар давраҳои якум ва дуюми амалиёт то 10 сентябр ва дар давраи дуюм то 10 декабри соли ҷорӣ ба мақомоти иҷроияи ҳокимияти давлатӣ дар шаҳри Душанбе ва Агентии назорати маводи нашъаовари назди Президенти Ҷумҳурии Тоҷикистон гузориш пешниҳод намояд.
Сафаргул АЛИМОВА, «Ҷумҳурият»
Баёни ақида (0) Санаи нашр: 01.06.2017 №: 109 Мутолиа карданд: 1260
