ҳуқуқ
МАРДУМФИРЕБӢ. ОҚИБАТИ ҶИНОЯТ ҶАЗО
Суди ноҳияи Вахш сокини 34 - солаи ҳамин ноҳия Орипов Баҳромро дар содир намудани ҷиноят бо моддаҳои 177 ва 247 қисми 2 бандҳои «а, б» - и Кодекси ҷиноятии Ҷумҳурии Тоҷикистон муттаҳам кард.
Тавре Назарзода Аҳлиддин Саид, судяи суди ноҳияи Вахш, ба «Ҷумҳурият» иттилоъ дод, Орипов Баҳром барои ба даст овардани даромади муфт бо роҳи фиреб ва суистифодаи боварӣ, бо расондани зарари ҷиддӣ ба шаҳрвандон машғул шуда, аввалҳои моҳи июли соли 2016 ба боварии шаҳрванд Қурбонов Қарахон, сокини ноҳияи Вахш, даромада, як сар чорвои калони шохдорро ба маблағи 2600 сомонӣ гирифта, маблағашро қисман пардохт кардааст. Ӯ чорворо бо мақсади фурӯхтан ба молбозори «Панҷшанбе» - и ноҳия Бохтар бурда, ба марди шахсияташ ба тафтишот номаълум ба маблағи 2550 сомонӣ фурӯхта, маблағи бо роҳи ҷиноят бадастовардаашро ба манфиати шахсиаш сарф кардааст.
Моҳи июли соли 2016 бошад аз шаҳрванд Исмонов Рамазон, сокини ноҳияи Вахш, як сар чорвои калони шохдорро ба маблағи 3000 сомонӣ нархгузорӣ карда, 1000 сомониашро дода ғайб задааст. Ӯ чорворо ба молбозори «Панҷшанбе» - и ноҳияи Бохтар бурда, ба маблағи 2500 сомонӣ фурӯхтааст.
Ҳамчунин, ӯ моҳи августи соли 2016 дар молбозори «Ҷумъа» - и шаҳри Қӯрғонтеппа Холов Ҳидоятулло, сокини ноҳияи Абдураҳмони Ҷомиро фиреб дода, як сар чорвои калони шохдорро ба маблағи 2250 сомонӣ гирифта, 1000 сомониашро дода, бедарак шудааст. Ин чорворо низ дар молбозори ноҳияи Вахш фурӯхта, ба ҷабрдида 1250 сомонӣ зарар расондааст.
Ӯ тахминан охирҳои моҳи августи соли 2016 низ дар молбозори «Тошробод» - и ноҳияи Вахш шаҳрванд Каримов Нурулло, сокини ноҳияи Вахшро фиреб дода, ду сар чорвои калонашро ба маблағи 3200 сомонӣ нархгузорӣ карда, 1050 сомонашро додаасту халос.
Орипов Баҳром ба ин кирдори худ қонеъ нашуда, 21 сентябри соли 2016 ба боварии Базаров Назрулло, даромада, аз хонаи истиқоматиаш ду сар чорвои майдаро ба маблағи 3200 сомонӣ нарх карда, пулашро надодааст. Ин ду чорворо низ дар молбозори «Панҷшанбе» - и ноҳияи Бохтар ба маблағи 2950 сомонӣ фурӯхтааст.
Ғайр аз ин, ӯ мувофиқи ҳалномаи суди ноҳияи Вахш аз 28 апрели соли 2014 уҳдадор шудааст, ки барои таъминоти як фарзанди хурдсолаш Орипова Омина то ба балоғат расиданаш ҳар моҳ ба андозаи 150 сомонӣ алимент пардохт намояд. Аммо, ӯ аз лаҳзаи қабули ҳалномаи суд то моҳи апрели соли 2016 қисман маблағи алименти фарзандашро пардохт намуда, новобаста аз огоҳиномаҳои суд аз моҳи апрели соли 2016 то инҷониб маблағи алиментро ба собиқ ҳамсараш Қаландарова Сарвиноз насупорида, қасдан саркашӣ кардааст, ки қарзаш 1350 сомониро ташкил медиҳад.
Бо татбиқи моддаи 67 қисми 2 - и Кодекси ҷиноятии Ҷумҳурии Тоҷикистон, бо роҳи қисман зам намудани ҷазо ба Орипов Баҳром ҷазои ниҳоӣ маҳрум сохтан аз озодӣ ба муҳлати 3 сол, бо адо намудани ҷазо дар калонияҳои ислоҳии низомаш умумӣ бидуни маҳрум кардан аз ҳуқуқи ишғоли мансабҳои муайян ё машғул шудан бо фаъолияти муайян таъйин карда шуд.
Лашкар ШАРИФ, «Ҷумҳурият»
Баёни ақида (0) Санаи нашр: 08.06.2017 №: 120 Мутолиа карданд: 1180
