ҳуқуқ
ТАҒЙИРОТ БА ҚОНУН МУБОРИЗА АЛАЙҲИ ТАБЛИҒГАРОНИ ИФРОТИРО ТАҚВИЯТ МЕБАХШАД
Минбаъд корбарони интернет ҳангоми мушоҳида намудани фаъолияти таблиғгарони гурӯҳҳои ифротгаро муваззафанд, то ба мақомоти марбута дар ин бора хабар диҳанд.
Ҷӯрахон Маҷидзода, раиси Кумитаи Маҷлиси намояндагон оид ба тартиботи ҳуқуқӣ, мудофиа ва амният, дар ин хусус зимни баррасии лоиҳаи қонун оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи фаъолияти оперативӣ – ҷустуҷӯӣ» дар ҳузури вакилон иттилоъ дод. Номбурда изҳор дошт, ки ҳадаф аз ворид намудани тағйиру иловаҳо ба қонуни мавриди назар тақвияти амалиёти фаврӣ - ҷустуҷӯӣ бар зидди гурӯҳҳои ифротгаро дар шабакаи интернет ва баланд бардоштани сатҳи ошкорсозии ҷиноятҳои марбут ба ҷалби шаҳрвандон ба созмону гурӯҳҳои ифротгаро тавассути шабакаҳои иҷтимоӣ мебошад.
Зикр шуд, ки ҳоло теъдоди корбарони интернет дар Тоҷикистон ба 3 миллион нафар мерасад, ки аз он 80 фисадаш ҳадафмандона ё ғайриихтиёр метавонад ба манбаъҳои ифротӣ дар интернет дастрасӣ дошта бошад. Ҷӯрахон Маҷидзода афзуд, ки ҳамарӯза дар кишварҳои Осиёи Марказӣ аз ҷониби гурӯҳҳои ифротӣ барои ҷалби ҷавонон ба сафи худ 90 ҳазор паёмак ирсол мешавад. Ҳамчунин, таъкид гардид, ки дар асоси яке аз бандҳои тарҳи мазкур ба мақомоти марбута иҷозат дода мешавад, то дар бораи шахсон ва гурӯҳҳое, ки дар интернет ба ҷалби шаҳрвандон ба созмону ҳаракатҳои ифротӣ машғуланд, иттилоъ ҷамъоварӣ намоянд.
Мунаввари САФАР, «Ҷумҳурият»
Баёни ақида (0) Санаи нашр: 09.06.2017 №: 121 Мутолиа карданд: 1157
