ҳуқуқ
ВАҲДАТ ВА ТАҲКИМИ ҲОКИМИЯТИ СУДӢ
Ҳоло дар тамоми гӯшаҳои Ватани ободу осудаи мо мардуми шарафманди тоҷик бо шодмонӣ ва шукӯҳу ҷалоли хос ба ҷашни 20-солагии Рӯзи Ваҳдати миллӣ омодагӣ мебинанд. Зеро ин санаи муборак дар баробари Рӯзи Истиқлолияти давлатӣ дар таърихи навини давлатдории мо аҳамияти фавқулода муҳим дорад.
Воқеан, рӯзи 27 июни соли 1997 дар саҳифаҳои таърихи давлатдории тоҷикон бо ҳуруфи заррин сабт ёфтааст. Зеро бо имзои Созишномаи умумии истиқрори сулҳ ва ризоияти миллӣ, ки ҳосили талошҳои давомдору самаровари Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буд, марҳилаи иттиҳоду ҳамбастагӣ ва худсозии миллӣ дар мамлакати мо фаро расид. Кунун таҳлили воқеъбинонаи раванди сулҳи тоҷикон нишон медиҳад, ки нақши Президенти маҳбубамон дар наҷоти миллат ва муттаҳид намудани мардум дар атрофи ғояҳои баланди сулҳу ваҳдат ҳамчун омили муҳимтарини ҳастиву ватандорӣ басо нишонрасу арзишманд аст.
Маҳз баъд аз истиқрори сулҳ ва таҳкими ваҳдати миллӣ, ки бо талошҳои ҷавонмардонаи Эмомалӣ Раҳмон ба даст омадаанд, 26 сентябри соли 1999 бо роҳи раъйпурсии умумихалқӣ ба Конститутсияи Ҷумҳурии Тоҷикистон тағйиру иловаҳо ворид гардида, барои бунёди давлати демократии ҳуқуқбунёд қадами устувор гузошта шуд. Дар ин замина Тоҷикистон соҳиби порлумони касбӣ ва доимоамалкунанда гардид. Дар асоси Конститутсия Ҷумҳурии Тоҷикистон то ба имрӯз бо ташаббуси бевоситаи Сарвари давлат бо истифода аз ҳуқуқи ташаббуси қонунгузорӣ ва мақомоти қонунгузории кишвар даҳҳо қонунҳои мукаммали ҷавобгӯ ба меъёрҳои демократия таҳия ва қабул шуданд, ки татбиқи амалии онҳо мамлакати моро ба яке аз давлатҳои комилан демокративу ҳуқуқбунёд табдил намуд.
Қобили зикр аст, ки таҳкими фаъ-олияти мақомоти судӣ ҳамеша дар меҳвари таваҷҷуҳи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, корҳои зиёде дар ин самт анҷом ёфтаанд. Чунончи, қабул ва татбиқи Барномаи ислоҳоти судӣ - ҳуқуқӣ шурӯъ аз соли 2007, ки маҳз бо эҳтимоми Пешвои муаззами миллат сурат гирифт, дар шаклгирии низоми боадолатона, таҳкими сохтори судӣ нақши муассир гузоштанд. Мо аз таҷрибаи кор дар мақомоти судӣ дарёфтем, ки ин раванд ба баррасии ҳаматарафаю ҳирфаии парвандаҳо мусоидат карда, дар такмили касбии судяҳо низ нақши муассир гузоштаву мегузорад.
Мо - кормадони мақомоти судӣ дар заминаи чунин шароитҳои мусоид талош мекунем, ки вобаста ба таъмини адолати судӣ, волоияти қонун, мубориза бар зидди ҷинояткорӣ, терроризми байналхалқӣ, экстремизми сиёсию динӣ ва таъмини рушди иқтисодию иҷтимоии кишвар дар ҷомеа тадбирҳои ҳадафрасро анҷом диҳем. Дастовардҳои даврони Истиқлолияти давлатӣ, сулҳи пойдору ваҳдати миллиро ҳифз намуда, барои таъмини волоияти қонун дар ҷомеа содиқона кӯшиш намоем.
Гулнора РАСУЛЗОДА, судяи суди шаҳри Панҷакент
Баёни ақида (0) Санаи нашр: 09.06.2017 №: 121 Мутолиа карданд: 1271