ҳуқуқ
ПУРСИШ ва ПОСУХ
Ба пурсиш Айналишо АЙНАЛИШОЕВ, муовини сардори Раёсати адлияи Вилояти Мухтори Кӯҳистони Бадахшон, посух гуфт. Зимнан, агар хонандагони гиромӣ пурсише доранд, метавонанд бо телефони 238-54-16 ба мо муроҷиат намоянд.
- Ба қайди давлатӣ гирифтани маслиҳатхонаи ҳуқуқӣ дар мақомоти бақайдгиранда дар кадом асос ва чӣ тавр сурат мегирад?
И. АҲМАДБЕКОВ,
сокини ноҳияи Дарвоз
- Мувофиқи банди 1 моддаи 25 Қонуни Ҷумҳурии Тоҷикистон «Дар бораи адвокатура ва фаъолияти адвокатӣ» шаҳрванде, ки соҳиби мақоми адвокатӣ гардидааст, ҳуқуқ дорад кабинети адвокатӣ, маслиҳатхонаи ҳуқуқӣ, коллегияи адвокатӣ ва бюрои адвокатиро таъсис диҳад. Дар асоси талаботи банди 1 моддаи 28 қонуни мазкур ду ва ё зиёда адвокат ҳуқуқи таъсис додани маслиҳатхонаи ҳуқуқиро доранд.
Барои бақайдгирии давлатии таъсиси маслиҳатхонаи ҳуқуқӣ ба мақомоти бақайдгиранда ариза бо замимаи ҳуҷҷатҳои зерин пешниҳод карда мешавад:
- шартнома дар бораи таъсисдиҳии маслиҳатхонаи ҳуқуқӣ. Дар шартномаи таъсисӣ аз ҷониби муассисон шартҳои ба маслиҳатхонаи ҳуқуқӣ додани молу мулки онҳо, тартиби иштирок кардан дар фаъолияти он, тартиб ва шарти ба маслиҳатхонаи ҳуқуқӣ қабул кардани аъзои нав, ҳуқуқ ва уҳдадории муассисони (аъзои) маслиҳатхонаи ҳуқуқӣ, тартиб ва шарти баромадани муассисон (аъзо) аз ҳайати он нишон дода мешавад;
- протоколи маҷлиси умумии муассисон, ки бояд, аз ҷумла қарорҳо дар бораи таъсисдиҳӣ, дар бораи тасдиқи ҳуҷҷатҳои таъсисӣ, дар бораи таъйин намудани роҳбари мақоми маслиҳатхонаи ҳуқуқиро дар бар гирад;
- оинномаи маслиҳатхонаи ҳуқуқӣ;
- маълумот дар бораи адвокатҳо (нусхаи шиноснома, варақаи шахсӣ, нусхаи шаҳодатномаи адвокат, рақами мушахаси андозсупоранда);
- ҳуҷҷатҳои тасдиқкунандаи суроғаи ҳуқуқӣ ва маҳали ҷойгиршавӣ, ки мақоми ваколатдори давлатӣ пешниҳод намудааст;
- расид (квитансия) ё нусхаи супориши пардохтӣ дар бораи пардохти боҷи давлатӣ.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 12.06.2017 №: 123 Мутолиа карданд: 1312
