ҳуқуқ
ҶИНОЯТ ва ҶАЗО
Агентӣ парвандаи раиси қаллобро ба суд ирсол намуд
Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Хатлон дар пайи муроҷиати як шаҳрванд раиси хоҷагии ниҳолпарварии Бустонқалъаи ноҳияи Бохтар Фахриддин Очилдиевро бо ҷурми қаллобӣ дастгир намуд.
Номбурда барои ҳуҷҷатгузорӣ намудани чойхонаи ҳамин хоҷагӣ ба номи як зан бо роҳи фиреб аз ӯ 16000 сомонӣ талаб карда гирифта, боз овардани маблағи 2300 сомонии дигарро тақозо намудааст. Дар натиҷаи гузарондани чорабинии фаврӣ - тафтишотӣ Фахриддин Очилдиев ҳангоми гирифтани 2300 сомонӣ дар дафтари кориаш дастгир гардида, далелҳои шайъӣ дарёфт ва мусодира шуданд.
Бино ба иттилои маркази матбуотии Агентии назорати давлатии молиявӣ ва мубориза бо коррупсия, вобаста ба ҳолати зикргардида нисбат ба Фахриддин Очилдиев бо аломатҳои моддаи 247 қисми 4 банди «б»-и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, баъди аз анҷоми тафтишоти пешакӣ бо тасдиқи фикри айбдоркунӣ барои моҳиятан баррасӣ намудан ба суд ирсол шудааст.
Гумонбари қотили ҳамсар
Кормандони мақомоти милитсия зимни гузарондани чорабиниҳои оперативӣ - ҷустуҷӯӣ марди 28-солаи сокини шаҳри Кӯлобро бо гумони расондани зарари вазнин ба саломатӣ, ки бо марг анҷом шудааст, боздошт намуданд.
Тибқи иттилои сомонаи Вазорати корҳои дохилӣ, гумонбаршуда 26 феврали соли 2017, тахминан соати 11:00 дар пайи муноқишаи оилавӣ ҳамсари 24-солааш, сокини ҳамин шаҳрро бо роҳи буғӣ кардан ба ҳалокат расондааст. Сипас, барои рӯйпӯш намудани ҷинояти содирнамудааш бо баҳонаи даст ба худкушӣ задани ҳамсараш, ҷасади ӯро дафн намудааст.
Баъд аз ташхиси тиббӣ, ки ҳолати воқеии корро ошкор намуд, нисбати гумонбаршуда парвандаи ҷиноятӣ оғоз гардида, тафтишот идома дорад.
Шуъбаи ҳуқуқи рӯзнома
Баёни ақида (0) Санаи нашр: 12.06.2017 №: 123 Мутолиа карданд: 1120