ҳуқуқ
13 СОЛ МАҲРУМ АЗ ОЗОДӢ. БОЗ ДАР БОРАИ ЯК ҶАВОНИ ГУМРОҲ
Суди шаҳри Душанбе парвандаи ҷиноятиро бо шикояти кассатсионии маҳкумшуда Фирдавс Турсоатов, зодаи шаҳри Ваҳдат, мавриди баррасӣ қарор дода, номбурдаро дар содир намудани ҷиноят бо моддаҳои 187 қисми 2, 32 қисми 3 - 4011 Кодекси ҷиноятии Ҷумҳурии Тоҷикистон гунаҳгор донист ва бо дастрасии моддаи 67 қисми 3 кодекси ҷиноятӣ 13 сол аз озодӣ маҳрум сохт.
Суди марҳалаи якум муайян намудааст, ки Фирдавс Турсоатов моҳи октябри соли 2016 ҳангоми дар муҳоҷирати корӣ дар шаҳри Краснодари Федератсияи Русия қарор доштанаш тавассути шабакаи интернетии «Зелло» ба барномаи «Раҳнамо» ба сӯи «Давлати исломӣ» ворид шуда, бо шаҳрвандони Ҷумҳурии Тоҷикистон Абу Довуд, Абу Муслим ва Абу Яҳё тавассути интернет робита намудааст. Баъдан, Фирдавс Турсоатов мунтазам бо онҳо дар тамос шуда, наворҳои видеоии ҷонибдорон ва аъзои гурӯҳи экстремистӣ - террористии «Давлати исломӣ» - ро дар шабакаи «Ютуб» тамошо менамудааст. Сипас ғоя ва мақсадҳои онро қабул ва ҷонибдорӣ кардааст.
Тахминан, моҳи октябри соли 2016 бо роҳи «байъат» намудан ба Абу Довуд ном шахси ба тафтишот номаълум, қасам хӯрдааст, ки «то нафаси охирин ба Амир хизмат намуда, дар роҳи ислом содиқ монда, ҳар вақту соат тамоми супоришҳоро иҷро менамояд». Ӯ навиштаҷоти «Салом Абу Довуд, ман Фирдавс, ба номи Худо қасам, ба наздат меоям ва мехоҳам дар барат бошам» - ро тавассути телефони мобилиаш навишта, ба номбурда ирсол намудааст. Вай бо ин роҳ дар фаъолияти иттиҳоди ҷиноятӣ (ташкилоти ҷиноятӣ) - и экстремистӣ - террористии «Давлати исломӣ» шомил гардидааст.
Фирдавс Турсоатов 12 декабри соли 2016 ба Тоҷикистон баргашта, дар ин ҷо тавассути шабакаи «Зелло» фаъолияти худро идома доданӣ шуда, дар назди худ вазифа гузоштааст, ки дар задухӯрдҳои мусаллаҳонаи кишварҳои хориҷӣ иштирок намояд. Номбурда 15 январи соли равон аз ҷониби мақомоти ҳифзи ҳуқуқ дастгир шудааст.
Коллегияи судӣ ҳангоми бетағйир мондани ҳукми суди марҳалаи якум талаботи бандҳои 10, 12 ва 26 - и Қарори Пленуми Суди Олии Ҷумҳурии Тоҷикистон № 12, аз 23 июни соли 2010 «Дар бораи таҷрибаи аз ҷониби судҳои Ҷумҳурии Тоҷикистон ба тариқи кассатсионӣ баррасӣ намудани парвандаҳои ҷиноятӣ» - ро ба назари эътибор гирифт. Дар асоси гуфтаҳои боло коллегияи судӣ таъйин кард, ки ҳукми суди ноҳияи Синои шаҳри Душанбе, аз 6 апрели соли 2017 нисбат ба Фирдавс Турсоатов бо моддаҳои 187 қисми 2 ва 32 қисми 3 - 4011 Кодекси ҷиноятии Ҷумҳурии Тоҷикистон бетағйир монда шавад.
Қурбониён АЛИШОҲ,
муовини якуми раиси суди шаҳри Душанбе
Баёни ақида (0) Санаи нашр: 14.06.2017 №: 125 Мутолиа карданд: 1119