ҳуқуқ
ҶИНОЯТ ва ҶАЗО
ҶАСАДРО БА ДАРЁИ СИР ПАРТОФТАНД
Ду сокини ноҳияи Бобоҷон Ғафуров, ки қаблан суд шудаанд, аз ҷониби кормандони милитсия якҷо бо дигар кормандони мақомоти ҳифзи ҳуқуқ бо ҷурми содир намудани ҷинояти куштор боздошт шуданд.
Бино ба иттилои маркази матуботи Вазорати корҳои дохилӣ, гумонбаршудагон 8 июни соли ҷорӣ дар ҳудуди Ҷамоати деҳоти Хистеварз дар дохили нақлиёти шахсии марди 21-солаи сокини ҳамин ноҳия бо ӯ муноқиша мекунанд. Дар натиҷа соҳиби мошинро латукӯб намуда, бо роҳи буғӣ кардан ба ҳалокат мерасонанд. Сипас, бо мақсади рӯйпӯш намудани ҷинояти содирнамудаашон ҷасадро ба дарёи Сир партофта, мошинашро ба ноҳияи Лайлаки Ҷумҳурии Қирғизистон бурда, ба маблағи 6 ҳазор сомонӣ фурӯхтаанд.
Нисбат ба далели мазкур бо моддаи 104 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, тафтишот идома дорад.
ТАЛОШИ ГУМРОҲОН ВА 25 СОЛ ПАСИ ПАНҶАРА
Бо ҳукми суди ноҳияи Рӯдакӣ А. Вазиров ва ҳамсараш М. Салимова барои кӯшиши пайвастан ба гурӯҳҳои террористӣ мутаносибан ба муҳлатҳои 13 ва 12 сол равонаи зиндон шуданд.
Дар ин бора маркази матбуоти Прокуратураи генералии Ҷумҳурии Тоҷикистон хабар дод. Бино ба иттилои манбаъ, парвандаи ҷиноятӣ нисбат ба А. Вазиров ва М. Салимова бо моддаҳои 32 қисми 3 - 4011 Кодекси ҷиноятии Ҷумҳурии Тоҷикистон баррасӣ шуда, ба он айбдор мешаванд, ки аввалӣ моҳи сентябри соли 2015 барои дидорбинии бародараш ба шаҳри Маскав рафта, ба доми таблиғгарони ташкилоти террористӣ-экстремистии «Давлати исломӣ» меафтад. Номбурда бо ҳамин таассурот моҳи октябри ҳамон сол ба Тоҷикистон баргашта, тавассути шабакаи интернетии «Зелло» бо шаҳрванди Ҷумҳурии Тоҷикистон Т. Назаров, ки дар Сурия қарор дошт, шиносоӣ пайдо намудааст. Дар натиҷа ба даъвати Т.Назаров барои пайвастан ба ташкилоти террористӣ-экстремистӣ розӣ шуда, бо ҳамроҳии ҳамсараш М.Салимова ва се фарзанди ноболиғаш ба Туркия парвоз мекунад. Вале, бинобар баста шудани марзҳо ба Сурия рафта наметавонанд. Баъд аз нокомӣ аҳли оила барои таҳсил дар мадрасаи Маккаи шаҳри Зоҳидони Ҷумҳурии Исломии Эрон аз Истанбул ба Теҳрон парвоз карданд. Онҳо зимни сафар ба ин шаҳр аз ҷониби кормандони ҳифзи ҳуқуқ дастгир ва ба Ҷумҳурии Тоҷикистон баргардонда шудаанд.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 15.06.2017 №: 126-127 Мутолиа карданд: 1108
