ҳуқуқ
ҶИНОЯТ ва ҶАЗО
Мудири бонк ба корманди агентӣ пора пешниҳод кард
Маъруфхӯҷа Насриддинзода, мудири филиали № 15 Бонки давлатии амонатгузории Тоҷикистон «Амонатбонк» дар шаҳри Турсунзода барои пешниҳоди пора ба корманди Агентии назорати давлатии молиявӣ ва мубориза бо коррупсия муттаҳам мешавад.
Бино ба иттилои сомонаи агентӣ, зимни санҷиши молиявӣ-хоҷагидорӣ аз сӯи кормандони ин ниҳод дар филиали «Амонатбонк» ҳолатҳои ғайриқонунӣ ба шаҳрвандон додани қарз дар ҳаҷми зиёда аз 147 000 сомонӣ ошкор шудааст.
25 майи соли ҷорӣ мудири филиали № 15 Маъруфхӯҷа Насриддинзода барои ғайриқонунӣ рӯйпӯш намудани камбудиҳои ошкоршуда ва ба таври мусбат ҷамъбаст намудани натиҷаи санҷиши молиявӣ ба корманди агентӣ ба сифати пора 120 000 сомонӣ пешниҳод намуд. Ба қавли манбаъ, корманди агентӣ қабули пораро рад карда бошад ҳам, номбурда мунтазам маблағи мазкурро ба ӯ пешниҳод намудааст. Дар натиҷаи гузарондани чорабиниҳои фаврӣ-тафтишотӣ, 30 май, М. Насриддинзода дар шаҳри Турсунзода, баъди ба корманди агентӣ додани 120 000 сомонӣ дастгир гардида, маблағи зикршуда ҳамчун далели шайъӣ ёфта гирифта шудааст.
Вобаста ба ин ҳолат нисбат ба Маъруфхӯҷа Насриддинзода бо аломатҳои моддаи 320 қисми 2-и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтишоти пешакӣ идома дорад.
Одамфурӯш дар назди қонун ҷавоб мегӯяд
Вазорати корҳои дохилӣ ба гумони харидуфурӯши одамон нисбат ба як зани 30 - сола, ки сокини шаҳри Душанбе гуфта мешавад, тибқи моддаи 130 Кодекси ҷиноятии Ҷумҳурии Тоҷикистон парвандаи ҷиноятӣ оғоз кардааст.
Тибқи иттилои маркази матбуоти вазорат, ин зан дар натиҷаи гузарондани чорабиниҳои оперативӣ - ҷустуҷӯӣ аз ҷониби кормандони милитсия боздошт гардидааст. Дар натиҷа муайян шудааст, ки гумонбаршуда бо роҳи фиреб ва ваъдаи таъмини ҷойи кори муносиб зани 23-солаи сокини шаҳри Душанберо 15 июли соли 2015 ба шаҳри Дубайи Амороти Муттаҳидаи Араб бурдааст.
Сипас, дар ин шаҳр ӯро ба истисмор гирифтор намуда, қасдан қарздор карда, бо ин роҳ маблағҳои аз ҷабрдида гирифтаашро ба манфиати шахсиаш сарф намудааст. Тафтиши ин қазия давом дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 19.06.2017 №: 129 Мутолиа карданд: 1193
