ҳуқуқ
НОБОЛИҒОНИ ШАБГАРД. АЗ БОЗДОШТУ МУҶОЗОТ ТО ДАЪВАТИ ВАЗОРАТ АЗ ВОЛИДОН
Қарори раиси шаҳри Душанбе Рустами Эмомалӣ аз 6 июни соли ҷорӣ «Дар бораи манъ кардани воридшавии ноболиғон ба марказҳои дилхушӣ ва интернет - кафеҳо дар вақти шабона» ба тасвиб расид. Мувофиқи он воридшавӣ ва будубоши ноболиғон дар чунин марказҳо ва дар вақти шабона ба фаъолияти меҳнатӣ ҷалб намудани онҳо қатъиян манъ гардида, раёсати Вазорати корҳои дохилӣ дар шаҳри Душанбе ва сохторҳои ноҳиявии он муваззаф шудаанд, ки дар ин самт тадбирҳои зарурӣ андешанд.
Бо мақсади иҷрои қарори мазкур ва нақша - чорабиниҳои Вазорати корҳои дохилӣ 15 июни соли равон кормандони Хадамоти пешгирии ҳуқуқвайронкунӣ байни ноболиғон ва ҷавонони вазорат якҷо бо ШВКД дар ноҳияи Исмоили Сомонии пойтахт чорабиниҳои мақсаднок гузаронданд. Бино ба иттилои маркази матбуоти Вазорати корҳои дохилӣ, кормандони милитсия дар маркази интернет ва бозиҳои компютерии «Патриот», воқеъ дар кӯчаи Шевченкои ноҳияи Исмоили Сомонӣ, як гурӯҳ хонандагони муассисаҳои таҳсилоти миёнаи умумиро, ки ба бозиҳои компютерии хусусияти зӯроваридошта машғул буданд, дастгир карданд. Дар таҳхонаи чойхонаи «Роҳат», воқеъ дар хиёбони Рӯдакӣ, ки дар он ҷо маркази бозиҳои компютерии «Реал» ҷойгир аст, шумораи зиёди хонандагони муассисаҳои таҳсилоти миёнаи умумии рақамҳои 8 ва 52, инчунин, таълимгирандагони гимназияи «Ҳилол» боздошт гардиданд. Маълум шуд, ки онҳо аз беназоратии волидон истифода бурда, дар бисёр мавридҳо ба мактаб намераванд ва вақти худро дар марказҳои компютерӣ мегузаронанд.
Бино ба гуфтаи Абдулло Шоев, нозири калони гурӯҳи матбуотии хадамоти мазкур, чунин чорабиниҳо, ҳамзамон, бо мақсади таъмини иҷрои Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» роҳандозӣ мешаванд. Дар ҷараёни гузарондани санҷишҳои муштарак ҳолатҳои зиёди вайрон намудани талаботи қонун аз ҷониби волидони ноболиғон ошкор гардиданд. Падару модари ноболиғону ҷавонони боздоштшуда мувофиқи талаботи қонунгузории амалкунанда муҷозот шуданд.
Вазорати корҳои дохилии Ҷумҳурии Тоҷикистон дар робита ба ин масъала, тавассути сомонаи интернетии худ аз падару модарон даъват ба амал овардааст, ки рафтору ҳаракати фарзандони худро таҳти назорати доимӣ қарор дода, нагузоранд, ки ба корҳои беҳудаю зараровар машғул шаванд.
Сафаргул АЛИМОВА, “Ҷумҳурият”
Баёни ақида (0) Санаи нашр: 19.06.2017 №: 129 Мутолиа карданд: 1177