ҳуқуқ
ҶИНОЯТ ва ҶАЗО
ҚОТИЛ. 30 сол аз озодӣ маҳрум гашт
Суди шаҳри Душанбе як сокини ноҳияи Рӯдакиро барои қатли бераҳмона бар асоси моддаҳои 104, қисми 2 ва 249 қисми 3-и Кодекси ҷиноятии Ҷумҳурии Тоҷикистон сӣ сол аз озодӣ маҳрум кард.
Баҳрулло Мирзоев, сокини ноҳияи Рӯдакӣ, ки қаблан бо ҳукми суди ноҳияи Фрунзеи шаҳри Санкт-Петербурги Федератсияи Русия суд шудааст, дар куштори Савринисо Иззатуллоева, истиқоматкунандаи шаҳри Душанбе, кӯчаи А. Ғуломов 117, хонаи 47 гунаҳкор ва равонаи зиндон шуд.
Бино ба иттилои Маҳмадшариф Раҳмонзода, судяи суди шаҳри Душанбе, суд зимни баррасии парвандаи ҷиноятӣ нисбат ба ин ҳодиса муайян кард, ки Баҳрулло Мирзоев тавассути рӯзномаи “Рекламная газета” ба эълон дар бораи хизматрасонии маҳсгарӣ таваҷҷуҳ карда, бо Савринисо Иззатуллоева дар тамос ва баъдан бо ӯ шиносоӣ пайдо мекунад. Номбурда ду маротиба-моҳҳои август, сентябр ба хонаи истиқоматии С. Иззатуллоева омада, бо пардохти маблағи муайян аз хизматрасонии ӯ истифода мекунад.
Баҳрулло моҳи ноябри соли 2015 қарздор шуда, барои пардохти он бо нақшаи пешакӣ 24 ноябри соли 2015 ба С. Изатуллоева занг зада, оид ба гирифтани маҳс маслиҳат кардааст. Бо мақсади пинҳон намудани шахсияташ ӯ курткаи зимистонаи сарпӯшдор пӯшида, ба хонаи маҳсгар рафтааст.
Пас аз анҷоми маҳс Баҳрулло бо баҳонаи нӯшидани об ба ошхона рафта, корди хоҷагиро гирифта, бо бераҳмӣ ба узвҳои ҳаётан муҳими С. Изатуллоева шонздаҳ зарба зада, ӯро ба ҳалокат расондааст. Қотил баъд аз куштор аз гардани марҳум гарданбанди тилло ва аз дохили чойник 550 сомонӣ, аз болои ҷузвдон 2 адад ангуштарини тилло ва 2 телефони мобилии тамғаи “Нокиа”-ро тасарруф намудааст.
Тилловориҳои тасарруфнамудаашро ба маблағи 870 сомонӣ фурӯхта, ҳамон рӯз боқимондаи қарзашро дар назди филиали ТХҚ “Имон интернейшнл” дар ноҳияи Исмоили Сомонӣ ва чанд хеши дигараш пардохт намуда, боқимондаашро ба манфиати худ харҷ кардааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 29.06.2017 №: 136 Мутолиа карданд: 1112
