ҳуқуқ
ПУРСИШ ва ПОСУХ
Ба саволҳо Ғуфрон БОЙМАТОВ-узви Иттифоқи адвокатҳои Ҷумҳурии Тоҷикистон ва Фарҳод ТОИРОВ, менеҷери департаменти муносибат ва ҳимояи Ташкилоти ҷамъиятии Ассотсиатсияи миллии занони соҳибкори Тоҷикистон, ҷавоб доданд. Зимнан, агар хонандагони гиромӣ пурсише доранд, метавонанд бо телефони 238 - 54 - 16 ба мо муроҷиат намоянд.
- Дар замони шӯравӣ 28 сол кор карда, ба нафақа баромадам. Ба ман 97 рубл нафақа таъйин карданд. Дар замони соҳибистиқлолӣ нафақаам аз 2 сомонӣ ба 265 сомонӣ расид. Соли 2015-ум, намедонам бо кадом сабаб, нафақаам 65 сомонӣ кам шуд. Соли гузашта дар асоси Фармони Президенти мамлакат муҳтарам Эмомалӣ Раҳмон нафақаамро дар ҳаҷми 48,80 сомонӣ зиёд карданд. Бигӯед, ки соли 2015 дар кадом асос нафақаи ман 65 сомонӣ кам шуд?
Муҳаммадюсуф Ибодов,
сокини ноҳияи Нуробод, нафақахӯри 87 - сола
- Ба саволи шумо чунин посух мегӯем, ки соли 2015 ягон санади ҳуқуқӣ дар бораи кам кардани андозаи нафақаи шаҳрвандон ба тасвиб нарасидааст ва ё ба қонунгузории амалкунанда оид ба таъмини нафақаи шаҳрвандон низ дар ин бобат тағйирот ворид нагардидааст. Бинобар ин, ба шумо тавсия дода мешавад, ки барои муайян кардани сабаби кам гардидани андозаи нафақаатон ба шуъбаи ҳифзи иҷтимоии маҳали зистатон муроҷиат намоед.
* * *
- Тақрибан панҷ сол мешавад, ки ба фаъолияти репетиторӣ-омӯзиши забонҳои хориҷӣ машғул мебошам. Ин корро баъзан дар манзили истиқоматиам ё дар дигар ҷойҳо анҷом медиҳам. Бигӯед, ки барои барасмиятдарории ин фаъолият ба куҷо бояд муроҷиат кунам?
С. АДҲАМ, сокини шаҳри Қӯрғонтеппа
- Мувофиқи талаботи Қонуни Ҷумҳурии Тоҷикистон «Дар бораи маориф» фаъолияти инфиродии омӯзгорӣ, ки ба гирифтани даромад равона шудааст, фаъолияти соҳибкорӣ ҳисоб мешавад ва бо тартиби муқаррарнамудаи қонунгузории амалкунанда бояд аз қайди давлатӣ гузарад. Яъне, мувофиқи номгӯи намудҳои фаъолияти соҳибкории инфиродие, ки дар асоси патент амалӣ мегардад, фаъолияти шумо бояд дар нозироти андози маҳали фаъолиятатон ба қайд гирифта шавад. Пас аз ин, дар нозироти андоз ба шумо барои машғул шудан ба хизматрасонии таълимӣ - репетиторӣ патент дода мешавад. Баъди аз муоинаи ҳатмии тиббӣ гузаштан, шумо метавонед дар асоси шартномаи хаттӣ бо мизоҷон расман ба фаъолият оғоз намоед.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 03.07.2017 №: 138 Мутолиа карданд: 1205
