ҳуқуқ
МАСНУОТИ ЗАРГАРӢ. ПЕШИ РОҲИ ҚОЧОҚ ГИРИФТА МЕШАВАД
Ҷиҳати иҷрои банди 8 протоколи маҷлиси Ҳукумати Ҷумҳурии Тоҷикистон, аз 29 апрели соли 2016, бо мақсади роҳ надодан ба қочоқи маснуоти заргарӣ, кам кардани андозаи пардохтҳои гумрукӣ ба он, пешгирии ҳолатҳои коррупсионӣ, фаъолияти ғайриқонунии соҳибкорӣ, поймол кардани ҳуқуқи истеъмолкунандагон, ҷалби бештари маблағҳо ба Буҷети давлатӣ ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2016» илова пешниҳод шуд, ки он аз ҷониби вакилони Маҷлиси намояндагон қабул гардид.
Тибқи иловаи мазкур, ба таври пилотӣ дар давоми як сол ба ивази андоз аз арзиши иловашуда, аксиз ва боҷи гумрукӣ ҳангоми воридоти маснуоти заргарӣ пардохти махсуси гумрукӣ ба андозаи барои воридоти 1 грамм маснуоти заргарӣ аз металли тилло 18 сомонӣ ва аз як грамм маснуоти нуқра 3,06 сомонӣ муқаррар гардид. То қабули ин тағйирот барои воридоти як грамм маснуоти заргарӣ аз металли тилло 77, 61 сомонӣ ва аз як грамм маснуоти нуқра 13, 23 сомонӣ муқаррар шуда буд.
Меҳринамо Ҷонмаҳмадова, муовини вазири молия, зимни баррасии лоиҳаи Қонуни Ҷумҳурии Тоҷикистон «Оид ба ворид намудани тағйирот ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2017» иброз дошт, ки дар давоми як сол, аз лаҳзаи ҷорӣ намудани пардохти махсус барои воридоти маснуоти заргарӣ, новобаста аз таъсири буҳрони молиявӣ ва коҳиш ёфтани қобилияти харидории маснуоти заргарӣ, аз ҷониби аҳолӣ ба Тоҷикистон 1069 килограмм маснуоти заргарӣ ворид шуд, ки аз ин ҳисоб ба Буҷети давлатӣ 6961 ҳазор сомонӣ пардохт гашт. Дар навбати худ, ин нишондиҳанда тахминан баробар ба маҷмӯи воридоти маснуоти заргарӣ дар панҷ соли сипаригашта мебошад. Рақамҳо аз он шаҳодат медиҳанд, ки амалишавии тадбири мазкур ҳамчун амри воқеӣ барои пешрафти соҳа нақши назаррас гузошта, ба ташкили низоми ҳавасмандкунандаи пардохти шаффофи боҷи гумрукӣ дар иртибот ба гардиши маснуоти заргарӣ заминаи мустаҳкам гузоштааст. Аз ин лиҳоз, бо мақсади дар доираи санадҳои меъёрии ҳуқуқӣ ба қонуни амалкунандаи кишвар ба таври доимӣ ворид намудани муқаррароти меъёри пилотии татбиқгардида, ки риояи муҳлати муайянро тақозо менамояд, ин тадбир рӯи даст гирифта шуд.
Мунаввари САФАР, «Ҷумҳурият»
Баёни ақида (0) Санаи нашр: 04.07.2017 №: 139 Мутолиа карданд: 1026
