ҳуқуқ
ҶИНОЯТ ва ҶАЗО
ПОРА
Директори мактаб бо даҳ ҳазор рубл ба даст афтод
Вазорати корҳои дохилии Ҷумҳурии Тоҷикистон аз боздошти директори яке аз муассисаҳои таҳсилоти миёнаи умумии шаҳри Конибодоми вилояти Суғд бо гумони гирифтани пора хабар дод.
Бино ба иттилои маркази матбуоти вазорат, гумонбар, ки аз ӯ зани 42 - сола ном бурда мешавад, ҳангоми гузарондани чорабиниҳои фаврӣ-ҷустуҷӯӣ аз ҷониби кормандони милитсия дастгир шуд. Номбурда моҳи феврали соли 2017 аз зани 55 - солаи сокини шаҳри Конибодом барои гузарондани наберааш аз як синф ба синфи дигар, ки дар соли хониши 2016 - 2017 дар дарсҳо иштирок накардааст, 10 000 рубли русӣ ҳамчун пора талаб намудааст.
Ба гузориши манбаъ, рӯзи 5 июли соли ҷорӣ директори мактаб дар ҳудуди бинои муассисаи таҳсилоти миёнаи умумӣ ҳангоми гирифтани маблағи нишондодашуда дастгир гардида, далели шайъӣ аз ӯ ёфта гирифта шуд.
Аз рӯи ин ҳодиса парвандаи ҷиноятӣ оғоз гардида, тафтишот идома дорад.
ДУЗДӢ
Амале, ки подошаш ҷавобгарии ҷиноятист
Дар пайи шикояти марди 32-солаи сокини деҳаи Файзободи Болои шаҳри Кӯлоб ба мақомоти корҳои дохилӣ кормандони милитсия як зани 22-соларо ба гумони дуздӣ аз манзили истиқоматӣ боздошт намуданд.
Бино ба иттилои сомонаи Вазорати корҳои дохилӣ, зани гумонбар бо мақсади дуздӣ 5 июли соли равон бо роҳи пинҳонӣ вориди хонаи истиқоматии сокини деҳаи Файзободи Боло шуда, аз он ҷо ҷавоҳироти тиллоӣ, ҷамъ ба маблағи 5000 сомониро дуздида, аз ҷойи ҳодиса ғайб задааст. Вале ин амали ҷинояткорона зимни гузарондани чорабиниҳои фаврӣ - ҷустуҷӯӣ аз ҷониби кормандони милитсия ошкор ва сокини маҳаллаи Заринкӯҳи шаҳри Кӯлоб, ҳамчун гумонбар дар содир намудани дуздӣ дастгир ва нисбат ба ӯ парвандаи ҷиноятӣ оғоз шудааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 10.07.2017 №: 143 Мутолиа карданд: 1132
