ҳуқуқ
КУШТОРИ БЕРАҲМОНА. ҚОТИЛ 27 СОЛ ПАСИ ПАНҶАРА РАФТ
Суди шаҳри Душанбе Маъруфҷон Турғунови 25 - сола ва Нуриддин Юлдашеви 26 - сола, сокинони шаҳри Душанберо дар содир намудани ҷинояти авбошӣ тибқи моддаи 237 Кодекси ҷиноятии Ҷумҳурии Тоҷикистон гунаҳгор ҳисобида, ба муҳлатҳои гуногун равонаи зиндон кард.
Тавре Амонзода Намоз Шариф, судяи суди шаҳри Душанбе, ба “Ҷумҳурият” иттилоъ дод, ин афрод бо ҷурми куштор мутаносибан аз 27 то 3 сол аз озодӣ маҳрум шуданд. Тавре зикр гардид, дар маҷлиси ошкорои судӣ муайян шудааст, ки рӯзи 21 январи соли ҷорӣ Маъруфҷон Турғунов бо таҳрики Нуриддин Юлдашев дар пайи як муноқиша шаҳрванд Н. Нуралиевро бо зарби корд ба қатл расондааст.
Ин кирдори ҷинояткорона, ки дар назди манзили зисти марҳум Н. Нуралиев, воқеъ дар кӯчаи ба номи Р. Каримови шаҳри Душанбе рух додааст, аз мушоҳидаи дигар одамон дур намондааст. Аз ҷумла, ин ҳолатро Тоир Маҳмадов, як рафиқи Н. Нуралиев аз масофаи дуртар дида, ба ҷойи ҳодиса меояд. Чун ба ҷойи ҳодиса расид Маъруфҷон Турғунов бо корди дар даст доштааш ба қафаси синаи ӯ низ зада, фирор мекунад. Вале ин охирин амали ҷинояткоронаи ӯ набуд ва бо ҳамин усул С.Сояев шаҳрванди дигареро, ки хост ӯро таъқиб кунад, захмдор намуд.
Дар ҷараёни мурофиаи судӣ, амали ҷинояткоронаи Маъруфҷон Турғунов бо далелҳои қотеъ тасдиқ гардиданд. Дар ин робита бо ҳукми суд Маъруфҷон Турғунов бо моддаҳои 237 қисми 3 банди “а”, 104 қисми 2 банди “к” ва 32 қисми 3-104 қисми 2 бандҳои “а, к” ва Нуриддин Юлдашев бо моддаи 237 қисми 2 банди “б” Кодекси ҷиноятии Ҷумҳурии Тоҷикистон гунаҳгор дониста шуданд.
Суд нисбат ба Маъруфҷон Турғунов мутобиқи талаботи моддаи 67 қисми 3 Кодекси ҷиноятӣ бо роҳи қисман зам кардани ҷазоҳои таъйиншуда, ҷазои ниҳоӣ дар намуди маҳрум сохтан аз озодӣ ба муҳлати 27 сол таъйин кард. Нуриддин Юлдашев бошад, бо моддаи 237 қисми 2 банди “б” Кодекси ҷиноятӣ 3 сол равонаи зиндон шуд.
Лашкар ШАРИФ, “Ҷумҳурият”
Баёни ақида (0) Санаи нашр: 13.07.2017 №: 146 Мутолиа карданд: 1290
